Thla 2-ah chetsualna vangin mi 17 thi Lirthei nung loa khalh phal a ni lo

Aizawl City Traffic SP C Lalthanmawia chuan thuchhuah siamin, kumin January leh February thla chhungin lirtheia chetsualna vangin mi 17 an thih tawh thu a tarlang a; lirthei khalhtute chu fimkhur tura chahin, "Lirthei khawl nung lo (switch off) chunga tlan hi dan phal loh a ni," a ti.

Traffic SP chuan, kumin January leh February thla chhunga lirtheia chetsualna vanga mi 17 an thi tawhn chu lungchhiatthlak tak leh thil pawi tak a nih thu a tarlang a; "Chiatna thleng ṭhin hi a bul berah chuan lirthei khalhtute inthlahdah vang te, rûi chunga lirthei khalh leh lirthei enkawl ṭhat tâwk loh vanga thleng a ni deuh ber," a ti a; lirthei enkawltute chu fimkhur lehzual tur leh, lirtheite chu an khalh chhuah hmaa uluk taka enfiah turin a chah.

C Lalthanmawia chuan, lirthei khawl nung loa tlan chu dan phal loh a ni tih tarlangin, "Chhiatna tam tak thlengte hi lirthei a nih dan tur anga enkawl loh leh dan palzût chunga khalh vang a ni fo," a ti a; April 12, 2017-a Electric Veng, Aizawla taxi pakhatin St. Mary's School hmeichhe naupang a su hlum chu driver fimkhur tâwk loh vang nia a lan thu a tarlang.

Traffic SP tarlan danin, lirthei vanga chhiatna thleng ṭhinte chu dan phal loha rûi chunga lirthei khalh vang a ni ber. Rûi chunga lirthei khalh ṭhinte chu Supreme Court Committee on Road Safety-in a hremna lekkawh dan tur a siam a, driving license thla thum tal suspend turin thupek a chhuah a ni.

Traffic police-te'n dan leh thupek kenkawhna kawngah nasa leh zualin ṭan an la mek tih sawiin Traffic SP chuan, "Dan bawhchhia mante chu dan angin an chungah hremna khauh takin lekkawh a ni ang," a ti.