CM-in puan ṭhuina hmunpui AGMC tlawh
Chief Minister Lal Thanhawla chuan, Ningani khan Luangmuala Industrial Growth Centre hmuna Apparel and Garment Making Centre-a Vakiria Computerised Embroidery-te'n hnathawh bul ṭanna ‘Commencement of Operation’ hun an siam chu a hmanpui.
He puan ṭhuina hmunpui hi Ministry of Textiles ruahmanna hnuaia North Eastern Region Textiles Promotion Scheme (NERTPS) kaltlanga din a ni a, a hlawm liana thawmhnaw hrang hrang ṭhuina/ siamna hmun tur a ni.
He project hi cheng nuai 1,818 man hu niin sorkar laipuiin a tum vek a, a sakna ram square metre 20,000 vela zau hi Mizoram sorkar pek a ni thung a; a enkawltu implementing agency chu ZIDCO an ni.
Thu sawiin Lal Thanhawla chuan, Apparel and Garment Making Centre ang thil siam chhuahna leh dehchhuahna ruhrel (manufacturing infrastructure) Mizoramin a nei chu thil ropui leh ram tana hmasawnna pawimawh tak a nih thu te, tunlai khawl changkang tak tak hmanga state dang aṭanga lakluh ngai loa tualchhung mite ngeiin Mizoram mamawh ṭhenkhat an phuhru tur chu thil lawmawm tak a nih thu a sawi.
He khawl hmunpui enkawltu 'operating agency' ni tura thlan Vakiria Computersied Embriodery ten hnathawh an ṭan thei chu lawmawm a tih thu a sawi a, helai hmuna hnathawkte chu an hlawhtlin chhuah ngei nan duhsakna hlanin a quality ṭha leh manhla thil siam turin a chah. He hmun kaltlanga Mizo ṭhalai 100 dawnin eizawnna an hmu nghal chu lawmawm a tih thu a sawi rualin Vakiria-te hmalakna fakawm a tih thu a sawi.
Chief minister chuan, kut hnathawh chu khawvela hna zawhawm leh khawi ramah pawh ngaihsan a nih thute sawiin puantah leh handloom-te hi hmeichhe thawh tura dah loa, tharum nei ṭha zawk mipa ten heng hna hi tlawma la loa thawh nachang kan hriat a ṭul, a ti a; sawrkar hna a van tawh avangin Mizoram tan themthiamna hrang hrang skill development lam a pawimawh tih a sawi bawk.
ZIDCO Managing Director kal chhuak ta Lalhmachhuana chuan, Apparel & Garment Making Centre din a nih chhoh dan leh hmalak dante chipchiar takin a sawi a; a tira harsatna an tawh dan leh Mizoramah a enkawl theitu tur hun rei tak an zawn hnua tuna a taka hnathawk theia a awm ta chu lawmawm a tih thu a sawi.
Thusawitu dang Pu Zothan Khuma, Secretary, Commerce & Industries leh Managing Director ZIDCO ni bawk chuan operating agency Vakiria chungah beiseina sang tak a nei tih a sawi a, ram pawna thawn chhuah tur khawpa hnathawk thei tura an beisei thu a sawi.
Lalsangzeli, Director, Vakiria Computerised Embroidery chuan hmalak an tum dante report pe a; Lalrobiaka, MLA, Chairman ZIDCO pawhin thu a sawi bawk.
Apparel and Garment Making Centre-ah hian unit pathum a awm a, unit 1 leh unit 2 te hi production and manufacturing facility niin Vakiria-in an enkawl a; Unit 3 hi skill development training-na hmun tur a ni a, Vocational School of Education-in an enkawl ang.
Unit-1 leh unit 2 ahte hian khawvel huap pawha puanṭhuina khawl ṭha 121 ve ve dah a ni a; tunah hian Vakiria Computerised Embroidery, Zarkawt enkawl tur niin tunah hian thawktu 98 vel nen bul ṭanin hma an la mek a ni.
He hmunah hian school uniform hrang hrang, t-shirt, jersey, kamis, mipa kekawr leh hmeichhe thawmhnaw chi hrang hrang a hlawmin an ṭhui dawn a; state pawn aṭanga thawmhnaw lakluhte man aia to bik loa tihchhuah an tum dawn a ni.
Centre sakna lungphum hi July 15, 2015 khan Union Minister for Textiles Santosh Kumar Gangwar chuan a phum a, peih fel a nih hnuin amah vekin June 6, 2016 khan a rawn hawng a ni.