Mizote'n hlauh tur dik kan hriat a ngai - Hawla

Chief Minister Lal Than­hawla chuan, Kris­tiante ni pawimawh pawh zah loa sorkar ni pawi­mawh atana ruat duhtute chu Mizote tan hlauhawm an nih thu a sawi.

Ningania Luangmuala Industrial Growth Centre hmuna Apparel and Garment Making Centre-a Vakiria Computerised Embroidery-te'n hna­thawh bul ṭanna, ‘Commencement of Ope­ration’hun an siam a hmanpuinaah Chief Minister chuan, tun hnaia sorkar laipui chet dan chu Mizo Kristiante tan a hlauhawm thu a sawi.

Hawla chuan Mizo zingah hlauh tur dik hre loa thil hlauhawm lo UID, Adhar Card leh thil dang hlau an awm tih a sawi a, "Hlauh tur dik tak chu kan sakhaw ni pawimawh bika sorkar hun pawimawh dang siam ṭhinte hi an ni zawk," a ti.

MPCC president ni bawk chuan, India ram sakhaw zalenna ram anga Krismas nia Good Governance Day hman leh tun hnaia Good Friday taka Digidhan Mela hman rawtna awmte hi Kristiante nek chepnaa ngaih theih nia a hriat thu a sawi a, sorkar laipuia a vawn fung chelhtute chuan an zia tak tak an chhuah chho mek nia a hriat thu sawiin, BJP kaihhruai sorkar chet dan a dem.