Petrol khuahkhirh a ṭulah ngai; thil dangah harsatna a awm lo
Food, Civil Supplies & Consumer Affairs (FCSCA) secretary Ramdinliani chuan, Assam leh Meghalaya-a ruahsûr nasa avanga rél leh kawngpui chhia avangin petrol khuahkhirh rih a la ngaih dawn thu a sawi a, "Thil dangah chuan harsatna a awm lo," a ti.
Vanglaini palai zawhna chhangin Ramdinliani chuan, Mizoramin petrol a phurh luhna ber Silchar-ah an la neih ṭhat bik loh thu sawiin, "Rel kawng chhia avangin Silchar depot-a stock turin motor hmangin Guwahati-ah phurh ve tho a ngai a, tun dinhmunah stock an nei ṭha lo," a ti a; diesel erawh chu Silchar dinhmun a ṭhat avangin harsatna a awm loh thu a sawi.
FCSCA Secretary chuan, kawngpui chhiate a ṭhat ṭan thu sawiin, "Harsatna hrang hrang karah petrol hi mipui ni tin mamawh tur ang tâwk chu phurh luh ve reng a ni. Mahse, miin an lak khawl ṭeuh ṭeuh chuan harsatna a thleng thei a, chuvangin, khuahkhirh rih a ṭul," a ti.
Railways lamin Silchar rél kawng chhia chu July thla chawlhkar hnihna velah a ṭhat theih an beisei tih sawiin Ramdinliani chuan, "Rél kawng hi a ṭha a nih chuan ngai kan awh leh vat turah kan ngai," a ti a; eng emaw harsatna avanga beisei anga Silchar aṭanga petrol lak luh lawk theih a nih loh chuan kawng dang aṭanga la lut turin Chief Minister leh FCSCA Minister-te nen an inbiak reng thu a sawi bawk.
FCSCA Secretary sawi danin, mipui ni tin mamawh dang, buhfai leh eirawngbawlna gas-ah harsatna a awm rih lo a; lak luh kawngah harsatna lian tham a awm loh bakah, Mizoramin a lâkna hmunte dinhmun pawh a ṭha rih a ni.