MZU hnuaiah graduate thar 4,183 an awm

Mizoram University chuan nimin zing dar 8 khan under­graduate - B.A., B.Sc., B.Com., B.Sc. (Home Science) leh professional course ṭhenkhat result a tichhuak a; final exam-ah zirlai 4,183 pass in, pass percentage 86.80% a ni. A pumpuiah Lalparvuli, Zirtiri Residential Science College-in grade/mark a hmu sang ber.

MZU hnuaia UG final exam-ah hian zirlai 4,819 an inlan a, chu'ng zinga 4,183 (86.80%) chu an pass a ni. Bachelor of Arts-ah zirlai 4,017 zinga 3,437 (85.56%) an pass a, Bachelor of Science-ah zirlai 540 zinga 493 (91.30%) an pass. Bachelor of Commerce-ah zirlai 244 zinga 235 (96.31%) an pass a, Bachelor of Science (Home Science)-ah zirlai exam mi 18 an pass vek (100%) a ni.

B.A. final year-ah zirlai pass vekna collge pahnih - Zawlnuam College (mi pariat) leh Helen Lowry College (mi 15) an awm. B.Com.-ah J Buana College, HATIM, Helen Lowry College leh St. Xaviers’ College zirlaite an pass vek a; B.Sc.-ah PUC ti ṭha berin, zirlai 259 zinga 244 (94.21%) an pass a ni.

Stream tina ti ṭha ber (gold medalist)-te chu B.A.-ah PUC zirlai Lalruatsanga, Economics niin, a Cummulative Grade Point Average (CGPA) chu 9.38 a ni. B.Sc.-ah Lalparvuli, Botany, Zirtiri Residential Science College niin, CGPA 9.64 a hmu. Commerce-ah Lalmalsawmi, Hrangbana College niin, CGPA 9.11 a ni a, B.Sc. (Home Science)-ah Lalremkimi, Zirtiri RSC niin, CGPA 8.60 a hmu.

Gold medalist zingah hian Lalparvuli, Botany, Zirtiri RSC chu a CGPA a sang ber (9.64) a, a pumpuiah grade/mark hmu sang ber a ni.

MZU chuan final year (6th semester) result bakah, 2nd semester leh 4th semester result a tichhuak bawk a; 2nd semester-ah zirlai 7,744 zinga 7528 pass in, pass percentage 97.21% a ni a, 4th semester-ah zirlai exam 6,857 awmin, 6,732 (98.18%) an pass bawk.

(Phek 2-ah zawm a ni)