Chhiatna thlengah ṭanpuina Pe thuai turin CM-in a chah

Chief minister Zoramthanga chuan, khuarel chhiatna tâwkte hnenah a rang thei ang bera State Disaster Response Fund aṭanga ṭanpuina pek a nih theih nan hma la thuai ṭhin turin sorkar official-te a chah.

June 21, Thawhlehni khan CMO conference hall-ah State Disaster Management Authority (SDMA) an ṭhukhawm a; fûr ruahsur vanga Mizoram hmun hrang hranga chhiatna thlenga hmalaknate sawihonaah Chief Minister chuan, chhiatna tâwkte a rang thei ang bera ṭanpuina pek an nih theih nan hma la turin official-te a chah a ni.

Ṭhutkhawmah hian District Disaster Management Authority (DDMA)-te'n fûr hmachhawn dan tura ruahmanna an neihte leh hma an lak dante an sawi a; NDMA hnuaia chhiatna hmachhawn leh hmalakna volunteer-te zirtirna kalpui dan te, SDRF inkaihhruaina thar te, Hunthar Venga lei tlahniam chungchang te, Covid-19 léng kaihhnawiha Mizoram dinhmunte ngaihthlak a ni bawk.

Meeting-ah hian deputy chief minister Tawnluia, Home minister Lalchamliana, Power & Electricity minister R Lalzirliana, FCSCA minister K Lalrinliana, EFCC minister TJ Lalnun­tluanga, chief secretary Dr Renu Sharma leh member dangte an tel a ni.