KHAWTHLIR

Thisen pe
Boston Higher Secondary School chuan nimin khan an sikulah thisen pek an huaihawt a, Civil Hospital, Aizawl tan thisen unit 61 an pe a, petute mipa 56 leh hmeichhia panga an ni.

Power bill pek hun
Power & Electricity department chuan tun thlaah online hmanga electric bill pek theih a nih loh avanga bill pe turte'n hun tam zawk an neih theih nan vawiin leh naktuk Zirtawpni hian online hmanga bill pek theih lohna hmuna bill peknate chu tlai dar 5 thleng inhawng turin a hriattir. Tlai dar 5 hnuah pawh bill pe tur an la awm chuan inhawng chhunzawm turin a hriattir bawk.

Meizial man
Assam Rifles-te chuan nimin khan Zokhawtharah ram dang meizial báwmpui 40 an man a, Customs hnenah an hlan. Meizial an man hi Rs 1,04,000 man a ni.

Pass lawmpui
Mizo Students’ Union Gen.Hqrs chuan thuchhuah siamin, Mizoram University-in under graduate result tluang taka a tichhuak chu lawmawm an tih thu an tarlang a; Mizo zirlai hlawhtlingte an lawmpui thu leh pass zo lote beidawng loa ṭan la thar tura an duh thu an tarlang bawk.

Training khâr
Mizoram Youth Commission, Serchhip DC leh SIRDPR-te'n Livelihood Generation for Returned Migrant Workers due to Covid-19 an buatsaih chu nimin khan khàr a ni. Training-a tel turin mi 80 thlan an ni a, cement mistiri, vawk vulh leh ei siam dante zirtir an ni.

Heroin man
Mizoram police CID (Crime) hnuaia Special Narcotics PS team chuan June 21, Thawhlehni khan Lalramhluni (24) d/o Lalramliana, Zuangtui leh Lalchhuanmawia (42) s/o T Thanzauva, Tuivamit te hnen aṭangin heroin gram 13.93 an man.

Minister-in hmanpui
Mizoram Cooperative Fish Farming Marketing and Processing Federation Limited chuan nimin khan Hawla Indoor Stadium-ah General Assembly vawi 18-na an hmang a, Cooperation minister C Lalrinsanga'n a hmanpui. Assembly thupui chu, 'In intodelh nan cooperative society kaltlangin sangha khawi rawh' tih a ni.

Police ruang hmu
Saipum bul ramria duty police PC Malsawma (44) s/o PC Dailova, Mission Veng, 1st MAP chu khawtlang huapa ni li zawn a nih hnuah nimin chhun dar 11:50 khan Bankang khâm, Saipum ramah thia hmuh a ni. PC Malsawma hi June 18, 2022 chhun aṭangin a awmna chin hriat a ni lo a, June 19 aṭangin khawtlang huapin zawn a ni.

Tuizem sem
AMC Ward-III councillor C Lalchhandami chuan nimin khan a bialah tuizém 70 a sem. Tuizem semte chu litre 1,000 dawng 10 leh litre 500 dawng 60 a ni. C Lalchhandami chuan, "Pathianin nunna atan tui min pek van ruahtui hi a thianghlim a, kan kháwl ṭhat a pawimawh a, mihring kan pun zel avangin tui renchem pawh kan thiam a pawimawh hle a ni," a ti.