Aizawl district-a hmalaknate thlirho

Aizawl District Development Coordination & Monitoring Committee (DISHA) chu nimin khan an chairman C Lalrosanga, Lok Sabha MP kaihhruaiin Secretariat conference hall-ah an ṭhu a, co-chairman K Vanlalvena, Rajya Sabha MP pawh a tel.

Ṭhutkhawmah hian centrally sponsored scheme (CSS) hrang hrang - MGNREGA, PMAY, SABY, WDC, SPMRM, DDU-GKY, DDU-GJY, AMRUT, Swaach Bharat Mission, NRDWP, PMGSY, SAUBHAGYA, PMUY, MDM, NLRMP, PMJDY, PMFBY, NPCDS, NTPC, JSY, JSSK leh a dangte kalpui dan, thlen chin, hmalak mekna leh hmachhawpte tarlan a ni a; rawtna an neihte an sawiho a ni.

Tarlan danin, December 2021 aṭanga April 2022 thleng khan MGNREGA-ah sorkar laipui aṭangin cheng nuai 6,483.37 hmuh niin, hna 2,390 thawh a ni a, Aizawl district-ah job card nei mi 21,059 an awm.

Samagra Siksha hnuaiah Aizawl district-a primary school 219 leh middle school 165 tuam chhuakin zirlai 14,324 hnenah uniform grant pek a ni a, a thlawnin zirlaibu P/S zirlai 9,284 leh M/S zirlai 7,424 hnenah sem a ni.

PMAY-URBAN hnuaiah housing unit 57 siam a ni a, mi pariat hnenah loan pek a ni. Smart City hnuaiah reverse vending machine 17 vuah a ni a, kawng sira tui thianghlim in tur water kiosk 24 siam a ni a, tourist guidance centre pali siam a ni bawk.

AMRUT (water supply) hnuaiah tuikhur 20, retaining wall/fencing paruk, in panga, rainwater harvesting scheme pakhat leh tuizem (reservoir) pasarih siam a ni a; PMGSY hnuaiah Aibawk, Darlawn, Phullen, Thingsulthliah leh Tlangnuam RD block-ah kawng km. 74.67-a thui siam a ni.

C Lalrosanga chuan, sorkar laipui scheme hrang hrang kaltlanga Mizorama hmalak dan chhui zuitu DISHA chu sorkar laipuiin a ngaih pawimawh thu a sawi a, "A chhawrtu mipuiin an chhawr ṭangkai ngei theih nan theihtawp chhuah ang che u," a ti.