MNF kaihhruai sorkar hian Laloo-a vanglai a ang tual tual - ZPM Ṭhalai

ZPM Ṭhalai chuan thuchhuah siamin, MNF kaihhruai Mizoram sorkar rorel dan chu Bihar-a Laloo-a vanglai a ang tual tuala an ngaih thu an tarlang.

ZPM ṭhalaite chuan, "Pathian leh kan ram tan titu inti MNF kaihhruai sorkar rorelna chuan Bihar-a Laloo-a vanglai a ang tual tual niin kan ngai. He thil hi secretary-te hna chanpual sîksawi kawngah chiang takin a hmuh theih a ni," an ti.

Restricted tender chhuah kawngah a duhthála Chief Minister a chêt theih loh vang nia ngaih theih turin Mizoram sorkara secretary-te hna chan sîksawi danah CM Zoramthanga'n chief secretary Dr Renu Sharma a hrem nia a lan thu ZPM Ṭhalai chuan an tarlang a; secretary dang hna chan sîksawiah pawh an nihna leh an hna chan inmil lo tak tak a awm nual niin an sawi.

ZPM ṭhalaite chuan, "Department tênau chantirin, Chief Secretary-in a chan tur àwm tak tak pawh a chantir lo niin a lang. Hei hian Pu Zoramthanga rorelna hi Laloo-a rorelna ang maia mumal lo leh mi ṭhenkhat dahṭhatna sorkar a nih zia a tarlang chiang hle," an ti.

MNF sorkar chu thil dang zawng aia ram leh hnam ṭhatna tur ngaihtuah tur leh sorkar kal sual tur véngtute chu hnawk tia dahṭha mai loin, kawng dik zawh phahna atan hmang zawk turin ZPM Ṭhalai chuan CM Zoramthanga thuràwn an pe a ni.