Covid-19 vanga thi pakhat awm belh

June 21, Thawhlehni khan Mizoramah swab sample 237 endik zingah Covid-19 vei mi 20 hmuh chhuah a ni a, hripui vangin mi pakhat a thi. Nimin khan hripui vei dam tawh mi 23 chhuahtir an ni.

Thawhlehnia Covid-19 positive hmuh tharte chu mipa pakua leh hmeichhia 11 an ni a; Rapid Antigen Test hmanga hmuh chhuah vek niin, positivity rate 8.44% a ni.

Mizoramah a záwnin ni kaw chhung hripui vanga thi an awm tawh loh hnuah June 21, Thawhlehni chawhnu dar 2:05 khan Lalbiakchhawna (64), Central Jail Veng chu Covid-19 vangin State Refferal Hospital-ah a thi a, hripui vanga Mizorama thi 702-na a ni. Lalbiakchhawna hi natna dang nei tel a ni a, June 13, 2022 khan SRH-ah enkawl ṭan a ni.

IDSP record angin, Mizoramah Covid-19 vei 2,28,771 hmuh chhuah a ni tawh a, mipa 1,06,509 leh hmeichhia 1,22,262 an ni a, mipa aiin hmeichhia 15,753-in an tam zawk. Nimin tlai dar 5 thleng khan mi 2,27,969 (99.65%) chhuahtir an ni tawh a, mi 702 (0.31%) thi tawhin, enkawl mek mi 100 (0.04%) an awm.

Nimin tlai dinhmun angin, Mizorama district 11 zingah Covid-19 positive awm tawh rih lohna district pathum - Siaha, Lawngtlai leh Hnahthial district-te a awm a; positive active case tamna ber Aizawl district-ah mi 53 an awm mek a, Kolasib district-ah mi 21 an awm mek bawk.