Bru-te'n min nèk kan remti lo - Zira April 28-ah sorkar leh HPC(D) inbe dawn

Home minister R Lalzirliana chuan, Mizoram mi Bru, Tripura-a relief camp-a awm mekte lâk lêtna turah Mizoram sorkarin a tih tur a tih vek tawh thu sawiin, "An nawm an mâka min nèk kan remti ngai lo. Supreme Court-in min nawr mah se, kan phal chin ang bâk a nih chuan kan ti lo ang," a ti. April 28, 2017-ah Mizoram sorkar leh HPC(D)-te an inbiak leh dawn thu a sawi bawk.

Minister R Lalzirliana hian April 15, 2017 khan IPR direc­torate conference hall-ah thuthar thehdarh­tute a kâwm a; Bru chung­changah Supreme Court-ah thubuai a awm avangin hmalak theih a ni rih lo a, Supreme Court-in hruai kîr a phal hun hunah hma an lak nghal tur thu a sawi.

Home Minister sawi danin, Tripura state chhunga Mizoram Bru awmte chu lâk lêt an nih hunah Mamit, Lunglei leh Kolasib district-ah dah an ni dawn a; chungte chu Mamit district-ah khaw 51, Kolasib district-ah khaw 10 leh Lunglei district-ah khaw palite a ni.

Mizorama hruai kîr chung­changah hian Mizoram Bru Dis­placed People Forum (MBDPF) chu Supreme Court-ah zualkoin, thil phût chi hrang 20 an nei a, hei vang hian Supreme Court chuan sorkar laipuia Ministry of Home Affairs (MHA) leh Mizoram sorkar chu Bru lâk lêt hna thawh mek chawlhsan rih turin a hriattir a ni.

Bru lâk lêtna atan Mizoram sorkarin a tih turte a tih vek tawh thu sawiin Lalzirliana chuan, Supereme Court order anga hmalak a ngai a nih pawhin, kan pawisa mamawh MHA-a thlen min remtihsak hun hunah hruai kîr leh hun emaw, hruai kîr dan turah thutlukna mumal tak siam theih a ni ang," a ti.

R Lalzirliana chuan, Bru-te chu Mizoramah an lêt ṭha duh lo tih a sawi rualin, kum 2016 tàwp lama enfiahnaah chuan an inlan ṭha hle tih a sawi a, "An duh hun huna an rawn lêt a, an lêt hnua BDO vela in report ang chi hi kan remti lo a, hruai kìrnaa lêtte chauh kan pawm," a ti a; Supreme Court-in hruai kìr a phal hun huna hma la nghal turin sorkar a inpeih thu a sawi.

Home Minister chuan, Mizoram sorkar leh Hmar People Convention (Democrats)-te chu kumin April 28-ah Aizawlah an inbiak chhunzawm dawn thu a sawi a; inbiak tawhnaa thutluknate chak taka bawhzui ve ve a nih thu sawiin, "Mizoram sorkar pawhin HPC(D)-te nena kan inbiakna zúlzuia tih tur kan neihte tihlawhtling turin Mizoram sorkara department hrang hrangah chak taka bawhzui a ni," a ti.

Mizoram sorkar leh HPC(D)-te hi inremna zawngin ṭum riat an inbe tawh a; kum 2010-ah ṭum khat, kum 2013-ah ṭum li, kum 2016-ah ṭum thum an inbia a ni.