MLPC Act khauh zawka lekkawh tum

Excise & Narcotics minister R Lalzir­liana chuan, Mizoram Liquor (Prohibition and Control) Act (MLPC Act) kenkawhna a ṭha tâwk lo tih an pha lo tih a sawi a; chutih rualin, "MLPC Act hi khauh zawka lekkawh tum a ni," a ti.

Minister R Lalzirliana hian Inrinnia IPR conference hall-a thuthar thehdarh­tute a kawmnaah MLPC Act chungchang a sawi a; Mizoramah zu chhêkkhawlna (warehouse) pathum leh zu zawrhna dawr (vendor) 68 a awm a, zu dawr 68 zinga 26 chu national highway leh state highway hnaiha awm a nih avangin Supreme Court thupek angin khar rih mek a nih thu leh, tunah chuan dawr 42 hawn mek a nih thu a sawi.

R Lalzirliana chuan, kum 17 chhung zu khap burna dan MLTP Act hman a nih hnuah a hlawhtlin tâwk loh avangin MLPC Act a piang tih a sawi.

MLPC Act hmanga zu zawrh a nih hnuah zu inna hmun (bar) siam tum a nih thu sawiin, "Dodalna a awm zel avangin tih a harsa a. Zu leia in duh an awm tho si avangin, phal lohna vantlang hmunah an in a, naupang, nu leh pa, mipuiin an hmu a, mawi lo kan ti a ni," a ti. Aizawlah chuan Aijal Club leh Hotel Ritz-ah bar a awm thu a sawi.

Minister chuan, "MLPC Act hnuaiah hian warehouse neitu te, vendor wineshop neitu te, zu lei theihna card neitute leh zu inte chungah dan khauh zawka lehkawh tum a ni," a ti.

Excise Minister sawi danin, Ware­house neitute'n dan anga Excise Commi­ssionerate aṭanga pek chhuah tura permit an siam bak pek chhuah a awm ṭhin thu leh, vendor wineshop aṭangin permit nei lo hnena zu hralh a awm ṭhin thu report an dawng. Permit chuang nei an awm thu te, mi dang hnena permit hawhtir an awm thute leh, naupang leh school uniform hàte hnena zu hralh ṭhin an awm thute report an dawng bawk.

Report an dawnte chu dan kalh tlat a nih thu sawiin Lalzirliana chuan, "Man chhuah an nih chuan warehouse leh vendor wineshop hi thla thum chhung suspend a ni ang a, a hnua dan bawhchhiatna hmuh leh a nih chuan an permit cencel a ni ang," a ti.

R Lalzirliana chuan, warehouse leh vendor wineshop-ah Excise & Narcotics hnathawkte an duty ṭhin tih sawiin, "Duty-te'n an hna dik takin an thawk tur a ni a, eng emaw puanhnuai thil awm anga sawite a awm tur a ni lo," a ti a; hna thawk ṭha lo hmuh chhuah a nih chuan dan angin action lak a nih tur thu a sawi.

Zawhna chhangin R Lalzirliana chuan, "MPLC Act hi hlih tumna a awm lo a, hlih tum lohna pawh a awm lo. Kan hnam tan a ṭha lo a nih chuan tihtawp mai tur a ni. Zu zawrh tirh lam kum hnih/khat chhung chu kan buai dawn tih hriat sa a ni a, chu hunah chuan kan la awm mek a ni," a ti.

MLPC Act chu a ṭhat leh ṭhat loh leh a nghawngte zir chiang turin sorkarin mi pariat a ruat tawh a, chu’ng mite chuan an zir chian mek thu sawiin, Excise Minister chuan, “A zir chiang­tute hi tumah hlau lo turin, sorkar pawh hlau lo turin kan ti,” a ti a; MLPC Act tihtawp rawt tur emaw, hman zui zel rawt tur emawin sorkarin thuràwn a pek loh tur thu a sawi.

Minister R Lalzirliana chuan passenger phur ṭhin lirthei khalhtu zu rûi hriate chu Excise & Narcotics hotute hnenah phone call emaw, SMS emaw hmanga hriattir thuai turin a ngen bawk.