Mizoram chanai lei tha Myanmar-ah hralh - Lalduhoma

ZNP president Lalduhoma chuan, lei tihṭhatna chemical fertiliser (urea) Mizoram quota-te chu Mizoramah lak luh a ni chungin Mizorama kut hnathawktute hnen a thleng lo a, Myanmar lamah an hralh vek ṭhin niin a sawi.

Lalduhoma hian Inrinni khan Aizawl Press Club-ah thuthar thehdarhtute kâwmin, chemical fertiliser-te chu India rama state tinin chanpual (quota) an nei tih a sawi a; quota atan sorkar laipuiin subsidy a pek bakah, transport subsidy thlengin a pe a, subsidy atan kum tin cheng vaibelchhe sing têl a sêng ṭhin tih a sawi.

ZNP President sawi danin, Mizoram sorkar hriatpuinain kum li (2013-14 aṭanga 2016-17) chhunga Mizoramin urea quota a neih zat belhkhawm chu 19,412.55 a ni. Mizoramin urea a lakna chu Barak Valley Fertiliser Corporations, Guwahati aṭangin a ni a; quota chu lak zawh vek zel a nih laiin, Mizorama kut hnathawktute hnenah pe loin, Myanmar lamah hralh ṭhin a ni. Urea-a state quota hi state dang hnenah pek chhawn theih a ni lo.

Mizoramah urea la luttu wholesale dealer 20 vel an awm tih sawiin Lalduhoma chuan, "Dealer hnuaiah retailer an nei vek tur a ni a, retailer hnenah chauh hralh tur a ni... Dan bawhchhia chu kum 7 chhung lung-in tàn thlenga hrem theih a ni," a ti. Dealer-te hming leh an lak luh zat an neih thu a sawi laiin, dealer list chu media-te hnenah a pe tel lo thung.

ZNP President sawi danin, Agriculture department chu nodal agency a ni a, Agriculture Director chu Controller a ni. Wholesale dealer-te'n urea an phurh thlen veleh DAO hnenah an hriattir tur a ni.

Urea lak luh leh pek chhuah kawngah kalphung awm sa chu Mizoramah chuan an bawhchhe vek nia sawiin, Duhoma chuan, "Wholesale dealer-te hian Guwahati aṭanga urea an lakte chu Zokhawthar an panpui nghal a, Burma ramah an hralh fai vek ṭhin. Allotment order leh waybill hmangin awlsam takin checkgate an paltlang thei a ni," a ti a; urea chungchanga thil tih vel ṭhin dan chu MNF sorkar laia aṭanga an tih dan niin a sawi.

Lalduhoma chuan, Guwahati aṭangin black-a urea phur ṭhin an awm bawk nia sawiin, "Allotment order leh waybill an neih loh avang­in Assam checkgate te, Vairengte, Kolasib, Zemabawk leh Champhai checkgate-te hnenah pawisa chawiin Ṭiau-ah an hralh. Vairengte checkgate-ah mi dik deuh an duty lai chuan Garmura lamah kalin Kolasib lamah an hêl ṭhin," a ti.

Lalduhoma chuan, sorkarna chelh a châk chhan lian ber zinga pakhat chu, Agriculture leh Horticulture department enkawl a nih thu sawiin, "Term khat chhunga green revolution thlentir a huphurhawm loh. Kan sorkar chuan term khat chhungin green revolution kan thlentir ngei ang," a ti. Kum tam tak chhung loneitute chanvo ei zo duhtu party pahnihte chu vote loh nachang hre turin mipui a chah a ni.

Urea-a Mizoram quota

Kum Quota zat (Matric ton)

2013-14 6851.55

2014-15 4273.60

2015-16 3649.40

2016-17 4638.00