MIMA-in 'Thingserh sah' hun hman an tum

Mizoram Merchant Association (MIMA) chuan, Aizawla Vishal Megamart hawn a nih danah thil dik lo an hmuchhuak zel nia sawiin, an duh lohna lantir zel an tum tih an sawi a; April 19, 2017-ah MIMA General Assembly-ah 'Thingserh sah' hun hman an tum thu an puang.

MIMA hruaitute chuan April 15, 2017 khan Aizawl Press Club-ah thuthar thehdarhtute kâwmin, Vishal Megamart chungchang an sawi. Vishal chu AMC Licensing Regulation hnuaiah August 24, 2016 khan Lalrinmawia (LRM) hmingin license pek a ni a, chutih laiin, Rajesh Mishra, Airplaza Holding Pvt.Ltd. hmingin February 21, 2017-ah, Taxation Aizawl North Zone-ah Value Added Tax (VAT) pekna turin ziah luh a nih thu an sawi.

MIMA hruaitute tarlan danin, February 28, 2017-ah kum hnih chhung dam tur ILP chu Rajest Mishra hnenah pek a ni a, ILP a neih hma ni sarih, February 21, 2017-ah Taxation department-ah VAT registration chu Airplaza Retail Holdings Pvt.Ltd. hminga pek a ni.

MIMA hruaitute chuan, ILP pek danah leh VAT hnuaia an inziah luh danah thil dik lo inphûm ngeia an hriat thu leh Vishal Megamart hawn a nih theihna atan AMC Councillor pakhat, local council member pakhat leh veng pakhata local council an inrawlh nasa hlea an hriat thu an sawi.

MIMA press statement chuan, "MIMA tum ber chu, Vishal Mega­mart hi hnam dang sumdawngte lo luhna bul ṭanna leh kawng hawnna a nih dawn vanga duh lo a ni," a ti a; Mizoram chu ṭhangtharte chenna tlaka a him reng theih nan ram leh hnam tana mi inpe 'Thing­serh sah' hmangin April 19-a MIMA General Assembly-ah an zawng dawn tih an sawi a ni.