KHAWTHLIR
Thisen pe
April 15, 2017 khan Savation Army Youth Territorial Council-in Mizorama Salvation Army kum 100 tlin lawm nan Temple corps-ah Aizawl Civil Hospital (ACH) tan thisen unit 133 an pe a; ṬKP Coordination, Aizawl huaihawtin Bawngkawn bial leh Zemabawk bialte'n BCM Ṭhuampui kohhran hall-ah ACH tan unit 114 an pe. Chhinga Veng East Branch KṬP-in an din champha vawi 16-na pualin Synod Hospital tan unit 41 an pe a, ṬKP Bethani unit, Champhaite'n Chamohai District Hospital-ah unit 14 an pe bawk.
Scooty-in su hlum
April 14, 2017 tlai dar 3:30 vel khan Champhai Vengthlangah hmeichhe tleirawl, kum tling lo khalh scooty-in RC Lalrinzami (58), Champhai Vengthlang chu a su thlu a, Lalrinzami hi a lu-ah hliamin, a hnu deuhah a hliam tuar loin a thi.
Stadium hlân
Salvation Army (SA)-te chuan SA India Eastern Territory kum 100 tlin an lawmna hmun tur, R Dengṭhuama Indoor Stadium-ah Inrinni khan an hnatlang a, Territorial commander Com. Lalngaihawmi'n Pathian hnenah an hlan nghal. Hnatlangah hian mi 500 vel an thawk chhuak. SA hian April 25-30, 2017 chhungin centenary an lawm dawn a, an hmunpui aṭangin Gen. Andre Cox-te nupa leh hruaitu dangte'n an hmanpui dawn a ni.
Edenthar-in dem
Edenthar Veng Local Council, YMA, MHIP leh MUP-te chuan thuchhuah siamin, an veng mi K Thanchungnungi (78), mi tu tin hriat lohte'n sawisa a, rawk a, a ina phuar beta an kalsan chu pawi an tih thu leh an dem thu an tarlang. Pawi khawihtute chu man chhuaka hrem ngei turin thuneitute an phût a; chhui tura Aizawl SP-in special investigation team a din chu lawmawm an tih thu an tarlang bawk.
Taxi khinna hnâwl
Aizawl khawpuia taxi intlân chhâwk duh loh vanga Aizawl Taxi Workers Union-in Gauhati High Court, Aizawl Bench an khinna chu High Court chuan April 3, 2017 khan a hnâwl. Aizawla taxi intlân chhawk mek hi September 1, 2016-a kalpui ṭan a ni.
Champhaiah bandh tum
MZP headquarters, Champhai chuan, Champhai District Hospital-a doctor indaih lohna phuhru tura sorkar an ngenna nawr zui nan April 18, Thawhlehni zing dar 6 aṭangin Champhai khawpuiah tiam chin awm loa bandh huaihawt an tum. Champhai MZP thuchhuah chuan, an thil phût tihhlawhtlin nan April 14, 2017 thlenga sorkar an ngaihchàn thu leh sorkar aṭangin chhànna an hmuh loh thu a tarlang a; an thil phût chu April thla tìr khan sorkarah an thlen niin a tarlang bawk.
Translation Book Award
Mizo Writers Association chuan ṭawng danga lehkhabu ziah, Mizo ṭawnga lehlin, kum 2016 chhunga chhuak zinga ṭha ber, Translation Book Award 2016 an thlanna kal mekah a ṭha zual pathum an thlang chhuak.
Translation Book Award ṭha zual pathumte chu - Lalzarzova Khiangte lehlin 'Kidnapped' (RL Stevension ziah) te, Lal-rammawia Ngente lehlin 'Rupert of Hentzau' (Anthony Hope ziah) leh, Zothanmawia Khiangte lehlin 'Vanramah Minute 90 chhung' (Don Piper leh Cecil Murphey-te ziah)-te a ni.
Heroin man
Excise & Narcotics department-a Anti-Narcotics Squad-te chuan, nimin zing khan Rangvamual leh Hunthar Vengah heroin gram 14 leh a neitua puh - Jerry Lalrammawia (31) s/o Rothangpuia (L), Vaivakawn leh Lalnunkima s/o Ali, Sairang Venglai nia inchhálte chu an man.