MYC-in Super IAS a kalpui leh dawn Hlawhtlinna mimal kutah a awm - MYC Chairman

Mizoram Youth Co­mmission (MYC) chuan Super IAS progra­mme a buatsaih leh dawn. MYC chairman Dr Vanlalṭanpuia, MLA chuan, sorkarin theih­tawp chhuah mah se, a hlawh­tlinna tak tak chu mimal kutah a awm thu a sawi.

Dr Vanlalṭanpuia hian nimin khan an pisaah thuthar thehdarhtute kâwmin, Mizo ṭhalai zinga all India service exam tura thiam leh tui mi 20 tan ALS Academy leh Chanakya IAS Academy, New Delhi nen ṭangkawpin kum 2020-21 ah crash course an buatsaih thu a sawi a, "Crash Course chauh a ni a, Delhi-ah thla ruk chhung awm tura tih an nih laiin, thla thum vel hnuah hripui vangin an rawn kîr a ni," a ti.

Chief Minister ṭha­hnemngaih­nain kumin atan mi 10 tan Super IAS programme buatsaih leh a nih thu sawiin MYC Chairman chuan, "Crash course mai ni tawh loin, foundation course kum khat chhung kalpui turin ruahman a ni. New Delhi-a academy ṭha ber ber dawrin Delhi-ah official-te nen kan kal," a ti a; Vajiram & Ravi, Vision IAS leh ALS-te nen an thawhho dawn thu a sawi.

Dr Vanlalṭanpuia chuan, Super IAS 20 an kalpuinaah fel tawk lo a awm thei tih sawiin, 'Tun ṭumah chuan uluk lehzualin ruahmanna siam a ni. Full sponsorship hnuaia kalte chuan prelims exam vawi hnih an hmachhawn hma chuan central leh state hnuaia hna exam phalsak an ni dawn lo. Bond sign tir vek an ni ang a, an awm danin a zir loh chuan sponsorship rulh lêt thlengin intiamtir a ni dawn,' a ti.

MYC Chairman chuan, sorkar chu ṭhalaite tana kawng hawngtu a nih thu sawiin, 'Sorkar chuan ṭhalaite tlinna kawng kan siamsak thei a, a hlawhtlinna chu mimal inpekna leh tumruhnaah a innghat,' a ti a, MYC-in scholarship programme a buatsaih anga ṭha chu hmun dangah a vàn a rin thu a sawi.

Mizo ṭhalaite UPSC hnuaia an tlin nghakhlel ber a nih thu sawiin Vanlalṭanpuia chuan, 'Kan tlin theih loh vanga mawhpuh tur kan zawng a nih chuan min puh mai rawh u, kan lo tuar mai ang. Hei bak hi tihngaihna kan hre tawh lo. Vawi leh khata thil hlawhtling nghal thut chi a ni lo a, kawng a inhawng ve zel. Kan ṭhalaite an la tlin mawlh mawlh hun a thleng ngei ang,' a ti.

Super IAS atan hian exam centre panga - PUC Aizawl, JB College Lunglei, Siaha College, Kolasib College leh Delhi-ah screening test buatsaih a ni dawn a, exam turin mi 397 an inziak lut a ni.