Chief Minister's Award sem a ni ; Ruih theih thil kan phêk do a ngai - CM

School Education department chuan nimin khan an conference hall-ah kumin HSLC leh HSSLC examination-a topper-te hnena Chief Minister's Award hlanna inkhawm an buatsaih a; khuallian chief minister Zoramthanga chuan, ruihhlo a hluar avangin phêk do a ngaih thu a sawi.

Chief Minister chuan, zu kaihhnawih natna tam lutuk leh HIV vei tam lutukin khawtlang nun a tihbuai thu sawiin, "Ruih theih thil hi kan phêk do a ngai a ni. Zu leh ruihhlo laka kan fihlim loh chuan kan hriselna tihchhiata awmin, kan nih tur ang ni thei lo dinhmunah kan awm thei," a ti a; zirlaite chu zu leh ruihhlo, zûk leh hmuam laka fihlim turin a chah.

Zirlai tam tak zinga a ber nih chu thil ropui tak a nih thu sawiin Zoramthanga chuan, "Tumruhna nasa tak nen chuan Mizoram chauh ni lo, India ram pum huapah pawh a ber in la ni thei," a ti.

Chief Minister chuan, hmànlai hun leh tunlai hun inkar a hlat tawh thu sawiin, "Khawtlang nunphung inthlauh tawhzia aṭangin zirnain kan khawtlang nun a chawisan dan a lang chiang hle," a ti a; lehkhathiamna chuan eizawnna bakah, mihring hman tlak leh ngaihtuahna changkang a thlen theih thu a sawi.

School Education minister Lalchhandama Ralte pawhin thu sawiin, Covid-19 hripuiin kum hnih chhung kawng hrang hranga harsatna a thlen zingah zirna chu a langsar ber zinga mi a nih thu a sawi a, "Kuminah India state hmun tam taka an theih loh, offline-a board exam kalpui theih a ni hi thawhhona ṭhatzia lantirtu a ni," a ti.

Chief Minister's Award hi kum 2014-ah sem ṭan a ni a, ṭum 10 sem a ni tawh. HSLC topper pahnih leh HSSLC-a Arts, Science leh Commerce-a topper mi pathum hnenah Rs 50,000 ṭheuh leh thuchei hlan a ni.