Tui bill ennawn a hun tawh hle - Deputy Chief Minister

PHE department chuan nimin khan Berawtlang Multipurpose Hall-ah department hnathawh thlir lêtna hun an hmang a, khuallian deputy chief minister Tawnluia, PHE changtu chuan, thil man sang zel ngaihtuahin tui bill ennawn a hun tawh thu a sawi.

Deputy Chief Minister chuan, tui bill ennawnna ṭum hnih ruahman a ni tawh tih sawiin, "Mahse, Covid hripuiin min tuam avangin mipui tan phurrit a ni dawn a, kaltlangpui a ni lo. Tui bill tuna kan hman mek hi kum 11 chuang kan hmang tawh a, Tlawng tui pump leh sem nan department-in tui litre khat zelah pawisa 7 a sèn laiin litre 5,000 chin hmangte chuan pawisa 4 chiah an chawi a ni," a ti.

Sorkarin tui litre khat zela a chawi belh chu pawisa 3 a nih thu sawiin Tawnluia chuan, "Hei hi subsidy-ah a ngaih theih. Sorkar tan sum hlohna a ni. Thil man sang zel ngaihtuahin leh department pawh sum thawk chhuak tura revenue target-te tuk an nih ṭhin angin tui bill ennawn a hun ve tawh hle a, kan tihmâkmawh a ni," a ti a, tui bill ennawn chu mipuiin an hriatthiam a ṭul thu a sawi.

PHE Minister chuan, tuihna hum­halh pawimawhzia sawiin, "Pumping scheme leh tui lâkna tur eng anga ṭha pawh nei mah ila, tuihna kan neih ṭhat loh chuan a ṭangkai tur angin a ṭangkai dawn lo. Tuihna humhalh mipui inzirtir hi department hnapui pakhat a ni a, mipui pawh nasa zawka kan ṭhanharh a ṭul," a ti.

PHE department hnathawh thlir lêtna inkhawm hi PHE secretary Lalmuanzova'n a kaihruai a, chaw­hnu­ah technical session neih a ni. Vawiinah chhunzawm a ni ang.