KHAWTHLIR
CYMA-in tanpui
Cachar tuilian avanga harsatna tâwk mekte tan Central YMA chuan a ṭula hman turin Silchar Branch YMA-ah Rs 25,000 an hlan. Tuilian kara tangkhang mekte chhan chhuahna atan life jacket eng emaw zat an thawn bawk.
Thisen pe
Laipuitlang Branch YMA chuan nimin khan an YMA Hall-ah thisen pek an huaihawt a, Civil Hospital, Aizawl tan thisen unit 51 an pe a, petute mipa 32 leh hmeichhia 19 an ni.
TNT-ah free clinic
National Health Mission hnuaia National Urban Health Mission bultumin nimin khan TNT camp, Zuangtuia awmte tan a thlawna inentirna buatsaih a ni. Nimin khan Pangpar Huan, Naupang leh DAC-a mite hriselna dinhmun endik a ni a, vawiinah hmeichhe chhul hmawr cancer enfiahna leh ṭul dangte buaipui leh a ni ang.
MP-in sikul tlawh
Rajya Sabha MP K Vanlalvena chuan nimin khan Durtlanga Special Blind School a tlawh. Special Blind School hotute'n an sikul mamawh leh harsatnate MP hnenah an lo thlen a; MP chuan a theihna zâwnah ṭanpui a tum thu a hrilh. Sikulah hian mitdel naupang 40 an awm mek a ni.
Puak thei thil man
Assam Rifles chuan June 22, Nilaini khan Hnahlan leh Ngur panna kawng pengṭhuamah maxicab MZ-01 N-3932-a passenger pakhat hnen aṭangin ralthuam lam chi, puak thei leh a kaihhnawih eng emaw zat an man. An thil mante chu detonator 13, cordtex metre 20, safety fuse metre 10 leh gelatin 17 a ni.
Mizoram che tha
Sainik School, Chhingchhip chu Sainik School Punglwa, Nagaland-a June 14-18, 2022 chhunga neih East Zone Inter Sainik Schools Sport and Cultural Meet 2022-ah basketball-ah an champion a, football-ah pathumna an ni. Inelnaah hian Sainik School - Purulia (West Bengal), Goalpara (Assam), Imphal (Manipur), Punglwa (Nagaland), East Siang (Arunachal Pradesh) leh Chhingchhip-te an tel a; Sainik School, Chhingchhip aṭangin zirlai 40 an tel a ni.