Oil leh gas zawn chhuah sawiho

Commerce & Industries minister Dr R Lalthangliana hoin June 22, Nilaini tlai khan Aijal Club conference hall-ah Mizorama tuialhthei leh gas zawnnaa hmalak tawhnate leh hmachhawp la awmte chak zawka kalpui theih dan tur sawiho a ni.

Dr R Lalthangliana chuan, Oil & Natural Gas Corporation leh Oil India ten kum 20 chhunga Mizorama oil leh gas zawn hna an kalpui chu a muang nia a hriat thu sawiin, "Chak zawka hma an lak a pawimawh. Hemi kawnga ṭul leh pawimawh Mizoram sorkarin a tih tur chu chak taka bawhzui mek a ni," a ti.

Minister chuan, tun hnaia Delhi a zin ṭumin oil leh gas zawn lama thuneitu ber Directorate General of Hydrocarbons a dawr a, Mizorama oil leh gas zawn hna chak zawka thawh a nih theih nan sawiho tura ONGC leh Oil India aiawhte Mizorama zin turin a ngen tih a sawi.

ONGC leh OIL aiawhte leh mithiamte chuan, Mizorama tuialhthei leh gas zawnga hma an lak tawhnate an sawi a; tlang rama hna thawh a hautak bik dante an tarlang bawk.

Ṭhutkhawmah hian Ministry of Petroleum & Natural Gas hnuaia Directorate General of Hydrocarbons (DGM), ONGC leh Oil India aiawhte an tel a; Mizoram sorkara Environment Forests & Climate Change, Land Revenue & Settlement, PWD leh Geology & Mining department hotute an tel a ni.