Mizoramah hripui vei enkawl lai mi 106 an awm

June 22, Nilaini khan Mizoramah swab sample 248 endik zingah Covid-19 vei mi 22 hmuh chhuah a ni a, hripui vei enkawl mek mi 106 an awm. Nimin khan hripui vei dam tawh mi 16 chhuahtir an ni a, Covid-19 vei thi an awm lo.

Nilainia Covid-19 positive hmuh tharte chu mipa pasarih leh hmeichhia 15 an ni a; Rapid Antigen Test hmanga hmuh chhuah vek niin, positivity rate 8.87% a ni.

IDSP record angin, Mizoramah Covid-19 vei 2,28,793 hmuh chhuah a ni tawh a, mipa 1,06,516 leh hmeichhia 1,22,277 an ni a, mipa aiin hmeichhia 15,761-in an tam zawk. Nimin tlai dar 5 thleng khan mi 2,27,985 (99.65%) chhuahtir an ni tawh a, mi 702 (0.31%) thi tawhin, enkawl mek mi 106 (0.04%) an awm.

Nimin tlai dinhmun angin, Mizorama district 11 zingah Covid-19 positive awm tawh rih lohna district pathum - Siaha, Champhai leh Lawngtlai district-te a awm a; positive active case tamna ber Aizawl district-ah mi 57 an awm mek a, Kolasib district-ah mi 15 leh Saitual district-ah mi 11 an awm mek bawk.