Police-te'n hmun hrang hrangah pawisa lem tam tham tak an man

Mizoram police-te chuan Mizoram hmun hrang hrangah tun hnaiah Rs. 2000 leh Rs. 500 note lem an man a, chu'ngte chu a tak ni se Rs. 54,01,000 a ni. Pawisa lem man kaihhnawihah mi 11 an man tawh a, jail-ah khung an ni.

Aizawl SP Lalhuliana Fanai chuan nimin khan a pisaah thuthar thehdarhtute kâwmin, Rs. 2000 leh Rs. 500 note lem an man chungchang a sawi a; pawisa lemte chu a tak a an viau laiin, uluk taka en chuan a tak leh a lem hriat hran awl tak a nih thu sawiin, fimkhur turin mipui a chah.

Aizawl SP sawi danin, March 24, 2017 khan Vaivakawn Police Station huam chhungah Rs. 2000 leh Rs. 500 note lem Rs. 5,05,000 an man a; chuta inhnamhnawih C Lalnunmawia (46) s/o C Lalkhuma, Chanmari West an man tel.

Bawngkawn Police Station-a mite'n March 28-ah Rs. 2000 note lem Rs. 1,98,000 an man a, chuta inhnamhnawih Vanlalhruaii (31) d/o Thanliana (L), Lamzam, Myanmar, tuna Edenthar Venga khawsa mek nia insawi te, Zomuanpuii (33) d/o Rosanga (L), Chawnpui, Aizawl leh Lallawmzuali (32) w/o Lalruatdiki, Ramhlun South nia insawite an man.

Vaivakawn Police Station-a mite'n March 31 khan Rs. 2000 note lem 305 (Rs. 6,10,000) an man a, a neitu T Thianlala (24) s/o T Thangkhanliana, Teikhang khua, tuna Vaivakawna khawsa mek nia insawi an man.

Aizawl Police Station-a mite'n April 6, 2017 khan Rs. 2000 note lem 114 (Rs. 2,28,000) leh a neitu Lalruatfeli (33) d/o Thanzama (L), Silchar an man a; April 11 khan Lalrinmawii (56) d/o H Lianzuala, Mission Vengthlang hnen aṭangin Rs. 2000 note lem leh Rs. 500 note lem Rs. 9,90,000 an man bawk.

Bairabi Police-te chuan April 14 khan Rs. 2000 note lem 1,300 (Rs. 26,00,000) manin, a neitu Kamal Islam (45) s/o Mahamudul Islam, Monachar, Hailakandi district an man a; Champhai police-te'n April 8 khan Rs. 2000 note lem 135 (Rs. 2,70,000) manin, a neitu mi pathum - Thangzama (48) s/o Thangzama (L), Bawktlang, Kolasib, Lalngilneii (38) w/o Zoramchuana, Hnahlan leh Lalthlamuanpuii (34) d/o Laldingliani, Rengtekawn-te an man bawk a ni.

Lalhuliana Fanai chuan, Rs. 2000 note lem chu a tak a ang viau a, mahse, danglamna chi li (4) a awm tih sawiin, "A lemah chuan Mahatma Gandhi thlalak awmna lamah a chho zawnga Rs. 2000 inziak a bawl ve lo a, ding lama 'Rs. 2000' inziak chunga a rûka Mahatma Gandhi lu lem a awm lo bawk," a ti.

Aizawl SP sawi danin, Rs. 2000 note lemah chuan a chhuk zawnga a hringa security treat inrínah a tle ve lo a, note sir ve vea thai chhiat ni âwm taka 7 inrín (bled line) chu a bawl ve lo a ni.