Duhoma'n pawl 4 thawhhonaah MPC party an tel a beisei

ZNP president Lalduhoma chuan, kum 2018-a Assembly inthlana pawl palite'n thawhho an tumnaah MPC party pawh an tel ve ngei an beisei thu a sawi.

Lalduhoma hian April 15, 2017-a Aizawl Press Club-a press conference a neihah zawhna chhangin, pawl palite'n thawkho tura April 13-a an inhmuh­khawm­naah MPC aiawh­te chu Thansiami (Brig. T Sailo nupui) thihna vangin an tel theih loh thu a sawi a, "Meeting lehah chuan an rawn tel ngei kan beisei," a ti.

Zawhna dang chhang­in Duhoma chuan, April 13-a Zoram Reformation Front (ZRF), Revolutionary Democratic Party (RDP) leh PRISM hruaitute nen an inhmuhkhawmna chu ZRF huaihawt leh buaipui a ni a, engkim an tum tih a sawi a; meeting an neih leh tur chu PRISM-in an buaipui ve thung dawn tih a sawi bawk.

Lalduhoma chuan, kum 2018 inthlan atan pawl hrang hrangte chu pakhat anga thawhho an tum thu sawiin, "Zawhte hi a vár nge a dum kan thlu lo, sazu a man theih chuan kan ti mai," a ti a; 'MNF ni lo, Congress ni lo,' tih chu an duh dan ni mah se, an ṭawngkam hman atan an duh lêm lo tih a sawi.