Gas bûr man chungchanga CJM thutlukna Additional Sessions Judge-in a hnâwl

Central YMA hnuaia Kumpuan Committee-in ei rawngbawlna gas bûr 11 an man, Chief Judicial Magistrate-in a neitute hnena a pek lêtna thupek chu Aizawl District Additional Sessions judge Vanlalenmawia Court-in a hnâwl.

Thu dawn danin, CYMA hnuaia Kumpuan Committee hian October 17, 2016 khan Zomawii, Vaivakawn in aṭangin gas bûr 11 a man a, Vaivakawn Police Station-ah hlanin, police-in Essential Commodities Act, 1955 hnuaiah thubuai an ziak lut.

Gas man a nih thu hi police-te chuan Aizawl District Collector (Aizawl DC/ District Magistrate) an hriattir a; District Magistrate chuan Zomawii chu insawifiah tur leh gas bur 11-te chu chhuhsak a nih loh chhan sawifiah turin a hriattir a ni.

Chutiang a nih lai chuan Aizawl District Chief Judicial Magistrate chuan gas bûr 11 chu Zomawii hnenah a pe let a; Aizawl CJM thil tih dan tur a ni loa ngaiin sorkar ukil (public prosecutor) RC Thanga chuan CJM thutlukna chu Court sang zawkah a khing let a ni.

Aizawl District Additional Sessions Judge chuan, Essential Commodities Act, 1955-in a sawi angin, ni tin khawsakna mamawh thilah Court a inrawlh tur a ni lo tih a tarlan bakah, Zomawii chungchang bikah Aizawl DC-in thubuai siam a, a neitua puh chu insawihfiah tura a tih mek laia Court-in thutlukna a lo siam chu thuneihna inchhuhsakna lam hawi a nih theih avangin CJM-in thutlukna a lo siam tawh chu hnâwl a nih thu, April 12 khan a puang a ni.

Aizawl District Additional Sessions Judge chuan, tun hnu zelah chuan eirawngbawlna gas bûr man kaihhnawihah reng reng, a bûr tihral dan tur chu District Collector-te thuneihna a ni tih hre turin Aizawl Chief Judicial Magistrate a hriattir nghal bawk.