BADP Action Plan 2017-18 pawm a ni

Chief secretary Lal-mal­sawma hoin nimin khan Secretariat Conference Hall-ah State Level Screening Committee (SLSC) an ṭhukhawm a; Border Area Development Programme (BADP) Annual Action Plan, kum 2017-18 chhunga Rural Development (RD) block 16 tan sum ruahman an pawm.

Meeting-ah hian BADP hnathawh chung­chang an ngaihtuah a; BADP hnuaia kum 2017-18 chhunga RD block 16-te tan sum ruahman an pawm taka block tinte sum ruahman dan chu international border line, mipui tam zawng leh ram leilung azira siam a ni.

BADP hnuaia hna thawh hrang hrang viltu Monitoring Cell tana sum ruahman pawh pawm niin, SLSC Chairman-in a ṭul anga a hman theih tur BADP tana sum ruahman, sum zawng zawng aṭanga 2.5% aia tam lo dah hran turin an pawm bawk.

BADP model village chungchang sawiho a ni a, Mizorama BADP model village atan Khawbung khua thlan a ni. Model village hi international border aṭanga a hlat zawng, ziak leh chhiar thiam zat, mipui tam zawng leh tehna dangte hmanga thlan a ni a; kawng tinrenga hmasawn tura ruahman a ni.

BADP hi kum 2015-16 thleng khan sorkar laipui sum vek hmanga kalpui a ni a, tunah chuan Core Centrally Sponsored Scheme (CSS) hnuaiah dah niin, sorkar laipuiin 90% leh state sorkarin 10% an tum a ni.

Meeting-ah hian Home, Finance, RD, Health leh Sports & Youth Ser­vices department, PHE depart­ment, Border Security Force, Assam Rifles leh Pushpak hotute an tel.