KHAWTHLIR

MJA Conference
Mizoram Journalist Association (MJA) chuan, vawiin hian IPR directorate auditorium-ah general Conference vawi 44-na an hmang dawn a, chief minister Lal Thanhawla khuallian a ni ang. MJA chuan an member-te chu conference ngai pawimawha tel vek turin an chah a, annual fee Rs. 100, welfare fund Rs. 100 leh MJWS fund Rs. 200 pe nghal turin an hriattir bawk. MJA-te hian naktukah Assembly House leh Raj Bhavan-te an tlawh nghal dawn a ni.

Thisen pe
Serchhipa Salvation Army ṭhalaite chuan, Salvation Army India Eastern Territory kum 100 tlin lawm nan April 15, 2017 khan JN Hospital (Serchhip District Hospital) tan thisen unit 37 an pe.

Court khâr mek
Gauhati High Court Chief Justice remtih angin, Mizorama Court-te chu khâr mek rih a ni. Court khâr hi April 13, 2017 aṭang khan ṭan a ni a, April 19 thleng khâr a ni ang. Court khâr chhung hian Court-a thawkte an chawl vek a, thubuai ngaihtuah hmanhmawhthlak bik (emergency case)-te erawh chu ngaihtuah a ni thung.

LC chairman báng
Republic Veng Local Council chairman T Vanlalruata leh treasurer Lalramnghaka te chuan an nihna aṭanga bànna an thehlut. Bànna lehkha chu April 14, 2017 khan Aizawl Municipal Corporation mayor PC Lalhmingthanga hnenah an thehlut a ni.

V/C thar ding
Zobawk North Village Council-a independent member-te chuan Congress pary an zawm a, hei vang hian Zobawk North-ah hian Congress party kaihhruai V/C a ding thar. V/C thar hi nimin khan a lawmna hun buatsaih a ni a, bialtu MLA Joseph Lalhimpuia, parliamentary secretary-in a hmanpui.