MPC-te'n inthlan hmachhawn dan tur an sawiho

Nimin, April 17 kha MPC party din champha vawi 42-na a ni a; office bearer-te chuan an party hruaitu KL Lianchia kaihhruaiin kum 2018-a Assembly inthlan hmachhawn dan tur leh ṭan lak dan turte an sawiho a, thuchhuah an siam nghal.

MPC thuchhuah chuan, an party dintu Brig. T Sailo leh ram tana a thawhpui ṭhin thi tawhte an hriat reng thu tarlangin, "Kan ram tana an hmalak tawhna zawng zawngte ropui kan ti a, ram leh mipuite tana an hmachhawpte hlawhtling taka hlenchhuak turin theihtawp kan chhuah chhunzawm zel dawn," a ti.

Kum 42 chhungin MPC-in party malin sorkarna vawi hnih an chelh hman tih sawiin MPC chuan, "Kan ram tana rotling, chhenfakawm kan duan pawh thui tak kan kalpui hman a, vawiin thlengin Brig. T Sailo policy leh programme kha hlawhtling chu ni se, tih hi mipui thlir dan a la ni reng," an ti.

MNF leh Congress nen sorkarna hun rei lo te an chan ve chhungin Lengpui Airport leh Serlui-B Hydel Project-te chu an thawhpui Congress leh MNF-te'n tihhlawhtlin tumna an neih loh laiin MPC minister leh MLA-te'n tihhlawhtlin ngei an duh avangin a hlawhtling ta niin an sawi.

MPC party chuan, rambuai laia harsatnate sukiang tura Brig. T Sailo hmalaknate hre thar leh turin mipui an ngen a, MPC-in hmalakna a kalpui mekte ṭawiawm thar leh turin mipui an ngen a ni.