Aizawl leh Champhaiah ruihhlo hâl

International Day Against Drug Abuse and Illicit Trafficking (June 26) pualin nimin khan Aizawl leh Champhaiah hun hman a ni a, ruihhlo tam tham tak hâl ral a ni.

Aizawlah chuan Trinity Hospital-a bawlh­hlawh hâlna khâwl hmangin Mizoram police-te'n ruihhlo an man chi hrang hrang, Rs 23,62,09,40,245 hû hâl a ni a, Home minister Lalchamliana'n a hmanpui.

Ruihhlo hâlna inkhawm hi DIG (CID Crime) Neihchungnunga, High Level Drugs Disposal Committee chairman ni bawkin a kaihruai a; Home Minister chuan, Aizawl leh Champhaiah Narcotics Control Bureau office dah dan tur ngaihtuah mek a nih thu a sawi.

Lalchamliana chuan, ruihhlo tawlh rûk leh hman sual chu khawvel pumin a buaipui thu sawiin, "Ruihhlo titute hian anmahni mai bakah an chhungte leh khawtlang an tihbuai ṭhin avangin ti lo tura inzirtirna hi chhungkua, zirna-in leh khawtlangah uar lehzuala kan kalpui a ngai. Supply reduction a pawimawh rualin, demand reduction tura hmalak mek a ni," a ti.

Mipui rilruah ruihhlo ṭhat lohzia tuh ngheh a nih chuan a ziaawm deuh a beisei thu sawiin Lalchamliana chuan, "Drug addict-te pawh misual ber ang maia en loin, damlo ṭanpui leh enkawl ngai an ni tih rilru put a pawimawh," a ti a; ruihhlo donaah theihtawp chhuah zel turin Police, Excise & Narcotics, Assam Rifles, YMA leh kohhrante a sáwm.

Ruihhlo hâlnaah hian khualzahawm DGP Devesh Chandra Srivastva pawhin thu sawiin, ruihhlo do chu Mizoram Police tana hna pawimawh ber zinga mi a nih thu a sawi.

Nimina Aizawla ruihhlo hâl ral tâk hlutna chu tualchhung rate-ah Rs 2,34,02,17,045 a ni a, international market-ah Rs 23,62,09,40,245 a ni thung.

International Day Against Drug Abuse & Illicit Trafficking pualin Champhaiah chuan bawrhsap James Lalrinchhana hoin District Hospital-a incinerator-ah heroin hawng 797 (kg. 10.36) leh ganja kg 105 hâl a ni. DC chuan, "Ṭhalaite damdawi hmang sual lo tur leh a ngawlvei tawhte enkawl leh chhan chhuah kawngah ṭan lak a ngai," a ti a, nu leh pate chu fate chincháng hre tur leh inkaihhruaina ṭha tak nena enkawl turin a chah.

Champhai District Drugs Disposal Committee buatsaih ruihhlo hâlnaah hian Champhai district police-te'n May 2018 leh February 2022 inkara ruihhlo an man - heroin hàwng 797 (kg 10.36), tualchhung hralhna anga Rs 2,39,10,000 (international rate-a Rs 51,80,40,000) man leh ganja kg. 105, Rs 3,15,000 man hâl a ni.

Ruihhlo laka fihlim tur leh ruihhlo leh a kaihhnawih laka inhnamhnawih lo tura intiamkamna signature campaign neih a ni a; kumin January-June chhunga Champhai police-in heroin kg. 6 chuang an man theihna tura thawh hlâwk zual police officer 12 hnenah chawimawina hlan a ni bawk.

Kumin June thla kal mekah Champhai police chuan NDPS Act hnuaiah thubuai 39 an ziak lut tawh a, mi 47 man tawhin, an zinga 13 chu ram dang mi an ni.