Tui bill tisang lo turin sorkar ngen

Peoples Conference party chuan thuchhuah siamin, PHE department enkawltu deputy chief minister Tawnluia'n tui bill tihpun a hun tawh thu June 23, Ningania a sawi chu ṭha lo an tih thu an tarlang a, tisang lo turin sorkar an ngen.

PC party chuan, India rama state hrang hrangah electric bill leh tui bill a hniam thei ang bera an kalpui mek laia Mizoram sorkarin electric bill leh tui bill tihpun a tum chu mipui tan phurrit tak tur a nih thu an sawi a, "Hripui vanga mi tam tak eibàr zawnna leh dinhmun a tlakhniam laia mipui phurrit belhchhahna tur lam hawia hmalakna hi kan duh lo tak meuh. Mipui dinhmun chawi kâng hmasa loa mipui phurrit belhchhahna tura hma la lo turin Mizoram sorkar kan ngen a ni," an ti.