KHAWTHLIR

Hmalakna thlir lêt
Aizawl mayor Lalrinenga Sailo hoin nimin khan AMC conference hall-ah lei laih khuahkhirhna dan, AMC Site Development & Slope Modification Regulations, 2017 zirhona leh hmalakna thlir lêtna neih a ni. Mayor chuan, lei laih khuahkhirh a pawimawh rualin, mipui tana zângkhai zawka hman tum a ṭhat thu a sawi a; geologist, engineer leh architect-te chu mipui tana rawngbawl an ni tih hriaa mipui harsatna siam lo turin a chah bawk.

Super IAS 40 Screening exam
Mizoram Youth Commission chuan nimin khan Super IAS 40 programme-a tel tur thlanna screening exam a buatsaih. Aizawl Centre-ah mi 188, Lunglei Centre-ah mi 44, Siaha Centre-ah mi 19, Kolasib Centre-ah mi 21 leh Delhi Centre-ah mi 10, an vaiin mi 282-in exam an hmachawn a; June 27, 2022-ah result tihchhuah tum a ni a, June 28-29, 2022 chhungin personal interview neih a ni ang.

Thisen pe
JL Higher Secondary School NSS chuan nimin khan an sikulah thisen pek an huaihawt a, mipa 53 leh hmeichhia 15-te'n Civil Hospital, Aizawl tan thisen unit 68 an pe. Lunglei Higher Secondary School NSS-in Civil Hospital, Lunglei tan an sikulah thisen unit 52 an pe bawk a, petute mipa 43 leh hmeichhia pakua an ni. ṬKP, Zemabawk Pastor Bial pawhin Aizawl Civil Hospital tan thisen unit 21 an pe a, petute mipa 17 leh hmeichhia pali an ni.

MLA-in hmanpui
Aizawl North-II bialtu MLA Dr Vanlalthlana leh AMC Ward-III councillor C Lalchhandami te chuan nimin khan a bial chhung, Ramhlun Venglaia Public Higher Secondary School-in Ramhlun South Community Hall-a Felicitation-cum-Freshers' Social an hman an hmanpui. Vanlalthlana chuan, hna thawhna leh zirnaah rinawmna vawng reng a, Pathian ṭihna nen ni tin hun hmang turin zirlaite leh zirtirtute a chah.

Silver jubilee lawm
Mizo Academy of Sciences chuan nimin khan Innovation Facility Centre-ah an kum 25-na, silver jubilee lawmna leh 23rd General Body Meeting cum Seminar on Natural Resources Management for Sustainable Development in Mizoram an buatsaih a, MLA pahnih Dr K Pachhunga leh Prof. F Lalnunmawia bakah, MZU registrar Lalnundanga ten an hmanpui.

Call centre hawng
Ran vulhtute'n vety doctor-te an biak theihna tur call centre chu nimin khan AH&Vety secretary Lalzarmawii'n a hawng. Call centre-ah hian toll free number +913892314226 dah a ni a, telephone service provider zawng zawngin animals in distress short code 1962 hmanga biak theih turin ruahman a ni dawn. Call centre hi RD block tina MVU-te nen an thawkho dawn a ni.

Tangkhangte Chhan chhuak
Cachar tuilian avanga Silchar-a Mizo tangkhang 33 leh hnam dang 10-te chu June 23, Ninagni khan Mizoram police leh Silchar YMA hmalaknain chhan chhuah an ni. Chhan chhuahte chu Silchar-a Synod Mission Compound-ah hruai an ni a, mi 16 chu June 23 khan Mizoramah hruai haw nghal an ni.