Mirethei zawk ngaihsak kawngah ṭan lâk thar a ngai - MLA Vanlalṭanpuia

MLA Dr Vanlalṭanpuia chuan nimina Mizo Hnam Rûna inkhawmah thu sawiin, mirethei zawk ngaihsak kawngah ṭan lâk thar a ngaih thu a sawi.

Dr Vanlalṭanpuia chuan, politics an luh chhanah an chian a ngaih thu sawiin, mihringte leh ram leilung enkawl tura ruat an nih thu a sawi a, "Inbei tawna inchirhtheh ngawt loin, thuràwn inpe tawna ram kan siam a ngai. Rorelna dik kan kalpui zel theih nan te, ram leilung kan enkawl danah te, mirethei zawk ngaihsak kawngahte kan zavaiin ṭan kan lâk thar a ngai a ni," a ti.

MNF party ṭobul a fuh nia sawiin Vanlalṭanpuia chuan, "A chi phûm hi a ṭha em em a, kan innghahna lungphùm a fuh êm avangin India ram pum thlir pawhin kum 60 hnuah pawh political party ngêlnghet berte zinga mi kan ni thei," a ti a; Pathian leh kan ram tan titu an nih avangin thil thleng danglam mila kal ve ngawt thei an ni lo niin a sawi.

Dr Vanlalṭanpuia chuan, Mizoram district hrang hrangah hmasawnna chak taka thawh a nia sawiin, "Kum 2023-ah pawh sorkarna kan siam leh ngei dawn a ni," a ti a; Mizo ṭhalaite all India central service-ah lut an tlêm avangin sorkarin ṭan a la a, tih tak takna nena central service-a luh tumte tan sorkar a inhawn reng thu a sawi bawk.