Mipui tana sorkar din kan tum - AAP Organising Board

Aam Aadmi Party (AAP) Organising Board member-te chuan nimin khan Aizawl Press Club-ah thuthar thehdarhtute an kâwm a; mipui tana sorkar din an tum thu an puang.

AAP Organising Board hruaitute chuan Mizoramah member 1,000 chuang AAP-ah an inziah luh tawh thu sawiin, "Mizorama district leh constituency-ah te, khua leh veng hrang hrangah thawhpui tur kan zawng mek a, AAP hian ṭhalai ram vei leh dikna duh, a taka hna thawk thei pên chhuak turin kan sáwmin kan ngen a ni," an ti.

Ṭhalaite'n tih tak zeta ram an vei a, an pên chhuah a, hna an thawh tak tak chuan Mizoram tan malsawmna leh hmasawnna an nih ngei tur thu sawiin AAP hotute chuan, "Kan ṭhalaipui, ram siamṭhat duh tak takte Mizoram tana pên chhuak turin kan sáwm mawlh mawlh a ni," an ti a; hruaitu tur mi huaisen, Mizoram siamṭhat duh mi, mi ṭha leh dik tan hmun a awm reng thu an sawi.

AAP hotute chuan, mi tam takin 'AAP hi Mizoramah pawh ding se, Mizo bawk hruaitu an nih chuan eng mah an ni leh chuang lo ang,' an tih thu sawiin, "AAP hian kalphung leh ruangám fel tak a nei a, mi pamham leh suma rinawm lote tan hmun a awm lo. Mahni insèn ralna leh inpekna tel lo chuan AAP hi zawm chi a ni lo," an ti.

AAP hmunpui lamin an ngaih pawimawh - eirukna tihbo, zirna, mipui hriselna, agriculture, horticulture, leiba tam lutuk rulhna leh thil dang tamtak an ngaih pawimawh hmasak dawn thu sawiin AAP hruaitute chuan, "Delhi leh Punjab-ahte kan hmuh mek ang mipui tana sorkar din kan tum," an ti a; cheng khat pawh nei lo ni mah se, mi dik leh ṭhate chu AAP danah chuan an tling zo vek tih an sawi bawk.