Kau-Tlabung leh Tuipanglui MHP-a Sum tichingpentu 2 thiam loh chantir

Kau-Tlabung leh Tuipanglui mini hydel project (MHP) siamnaa sum tihchingpen thubuaiah Power & Electricity engineer Laldawngliana leh supplier Swopan Kumar Roy te chu hrehawm taka táng tura hrem an ni a, an sum tihchingpen zatve, Rs 3,63,000 ve ve chawi tura tih an ni bawk.

Aizawl District Court-a special judge (Prevention of Corruption Act) Vanlalen­mawia'n nimina judgement order a tihchhuaha a lan danin, Kau-Tlabung leh Tuipang­lui MHP siamnaah sum tihchingpen a awm nia an hriat avangin PRISM president Vanlalruata leh general secretary RL Liantluanga te chuan Anti-Corruption Bureau (ACB)-ah complaint an thehlut a, chhui zui a ni.

Project thawh a nih laia PE department SDO Laldawngliana leh supplier Swopan Kumar Roy te chu thirlèn (chain link wire-mesh) hlûm (roll) 66 man pek chhuah si, a tak hmuh tur awm loh vangin thubuai siamsak an ni a; an pahnih hian PC Act Court chuan thiam loh chantirin, nimin khan hremna tur puan a ni.

PE department officer Laldawngliana s/o Hmelmawia (L), Ramhlun North chu IPC 120B/420 hnuaiah hrehawm taka kum hnih chhung táng tur te, IPC 120B/409 hnuaiah kum hnih chhung táng tur te, IPC 477A hnuaiah kum hnih táng tur te, PC Act, 1988 13(1)(c)(d) r/w 13(2) hnuaiah kum hnih chhung táng tura hrem a ni a; Rs 3,63,000 chawi tura tih a ni bawk.

Supplier Swopan Kumar Roy s/o DM Saha, Chanmari, Aizawl chu IPC 120B/420 hnuaiah kum hnih chhung leh IPC 403 hnuaiah kum khat chhung hrehawm taka táng tur leh Rs 3,63,000 cháwi tura hrem a ni.

Laldawngliana leh Swopan Kumar Roy te hi pawisa an chàwi tur an pek loh chuan ni 90 dang tàn belh turin Court chuan a ti a; Court sang zawka an kal theih nan bail-a chhuah a phalsak bawk.

Hetih lai hian, a hun laia PE department superintending engineer Lalnunmawia Sailo s/o Ngurliana (L), Zonuam, Aizawl erawh chu thiam chantir a ni thung.

Kau-Tlangbung leh Tuipanglui MHP-a sum tihchingpen thubuaiah hian mi eng emaw zat hming a lang a, chu'ng zingah chuan PWD engineer-in-chief hlui, a hun laia chief engineer Liansanga leh PWD officer dang eng emaw zat an tel.

Thubuaia charge sheet leh a kaihhnawih thil pawimawhte chu February 8, 2016-ah Court-ah thehluh a ni a, kum 2016-a special judge (PC Act) Lucy Lalrinthari chuan October 27, 2016-ah thutlukna siamin, sum tichingpena puhte - PWD officer pathum Liansanga, Lalnunmawia Sailo leh Laldawngliana bakah, Swopan Kumar Roy te chu thiam a chantir.

Court thutluknaah lungawi loin state (sorkar) chuan Gauhati High Court, Aizawl Bench-ah a appeal a, High Court chuan ngaihtuah leh turin PC Act Court a hriattir a, October 3, 2017-ah thubuai ngaihtuah leh ṭan a ni.