CM-in chanchinbu mite khawtlang nun Siamṭhat kawnga thawhpuiah a sáwm

Mizoram Journalist Association (MJA) chuan, nimin khan IPR directorate auditorium-ah General Conference vawi 44-na an hmang a, chief minister Lal Thanhawla khuallian a ni. Chief Minister chuan, chanchinbu mite chu khawtlang nun siamṭhatna kawnga thawhpuiah a sáwm.

MJA General Conference hi vice president Zonunsanga Khiangte-in a kaihruai a, general secretary C Lalhmachhuana leh treasurer R Lalhmangaihzuala te'n report pein, secretary Zohmingmawia'n inhmelhriattirna hun a hmang. Secretary Lalremsiama kaihhruaiin April 2016 leh March 2017 chhunga MJA member thi mi palite sùnna hun hman a ni.

CM Lal Thanhawla chuan, chanchinbu mite chu khawtlang nun siamṭhat kawnga ṭhahnemngai taka thawk tura chahin, Kut tling loa sum lak kan ramah a reh theih nan a zirtirtuah in ṭan ka duh," a ti a; Mizorama project lian thawh dawna huphurhawm ber chu kut tling loa sum lak a nih thu sawiin, chu chu a reh theih nan thawhpuiah chanchinbu mite a sáwm a ni.

Lal Thanhawla chuan, thiamna sang zelah chanchinbu mite mawhphurhna pawh a sang zel tih sawiin, an mawhphurhnate hre chiang turin a chah a, "Inzir chhuak ni lo mah ila, mahni inzir zel theih a ni. Freedom (zalenna) in nei ṭha a, press freedom hi mawhphurhna hlen chhuah nan hman thiam a ngai," a ti a; chanchinbu mite tan thu dik a pawimawh ber fo tih hre turin a fuih.

Faina leh hriselna kawngah ṭak lak nasat a ngaih thu sawiin CM Hawla chuan, chutiang kawnga mipuite kawng kawhhmuhtu ni turin media-te a chah a, "Ringtu zaa za kan nih avangin faina lamah entawn tlak kan ni tur a ni. Faina leh hriselna kawngah mipui kaihruaitu ni turin kan beisei che u," a ti.

Chief Minister chuan chanchinbu mite chu àwn lam leh ṭan lam nei lo tur te, thu lái la ṭhin tur te, mipuiin thu dik an hriat theih nana theihtawp chhuah tur te, ṭawngah fimkhur a, mipui leh ṭhalaite Mizo ṭawng dik hriattir turtein a chah bawk.

MJA president Vanlalrema Vantawl chuan, journalist-te intlansiakna tur pakhat chu ram khalh ngiltu nih a ni tih sawiin, "Mi thil ti theite thu ziak chhawngtu chauh kan ni tur a ni lo. Engti kawng zawng pawhin thu dik hretu kan ni tur a ni a, keimahnia a ber ṭheuh phawrh chhuak turin theihtawp kan chhuah reng tur a ni," a ti a; mipuiin chanchinbu miteah beiseina an neih ṭhin avangin an pawimawhna hre chiang turin a chah.

MJA inkhawmpuiah hian district tin aṭangin palai an tel a, IPR secretary Biaktluanga, director Lalnithangi leh IPRO dangte'n an hmanpui. Chawhnu lamah rorel inkhawm neih a ni a, tlaiah ruai an ṭheh. Vawiinah Raj Bhavan leh Assembly House-te an fang ang.

Rorelnaa an thu pass zingah, sorkar department aṭanga advertisement bill reng reng, a neitu account-a thun ve a nih theih nana hmalak te, district-a MJA member tinin advertisement an hmuh ṭhat theih zawkna tura hmalakte a tel.

MJA hian resolution pass in, "Mizoram sorkarin Mizoram Journalists' Welfare Society sum a tipung hi MJA chuan lawmawm a ti a. Tihpun a nih theih nana thawktu zawng zawng chungah MJA chuan lawmthu a sawi a ni," an ti.

MJA-ah hian Mizoram pumah member 182 an awm a, chu'ng zinga mi 128 chu accredited journalist an ni a; an hmunpui Aizawl bikah MJA member 87 an awm. Kum 2016-17 chhungin an member pali an thi a, member 17 an chawlhtir laiin, member thar pali an la lut a ni.