Damdawi-ina doctor dah belh phûtin Champhaiah total bandh huaihawt

Champhai District Hospital-a doctor dah belh tura sorkar kar nan MZP headquarters, Champhai huaihawtin nimin khan Champhai khawpuiah total bandh huaihawt a ni a, sorkar aṭanga thu lawmawm an dawn loh avangin vawiinah pawh an chhunzawm dawn.

Champhaia total bandh avang hian Champhai khawpui hmun lûn laite a reh a, dawr inhawng leh khawlaia lirthei tlân a awm lo a; buaina chhuak leh harsatna lian tham a awm hriat a ni lo. Bandh hian bawnghnute sem, chanchinbu sem leh damdawi-in pan ngaite erawh a huam lo thung.

MZP-te thil phût chungchangah nimin khan Champhai DC hoin sorkar hotute leh Champhai MZP hruaitute an inbia a; MZP lam hian lungawina tur an hmuh loh avangin vawiinah bandh an chhunzawm dawn niin Champhai aṭanga thu dawnna chuan a sawi.

Champhai MZP-in February 25, 2017-a press release an lo siam tawh ang chuan, an hruaitute'n February 24-ah Health Minister hmuin Champhai District Hospital-ah doctor dah belh turin an ngen. Doctor mamawh zual nia an tarlante chu - surgeon pakhat, naupang specialist pakhat, medical officer pahnih, pharmacist pakhat leh District Jail-a awm tur doctor pakhatte a ni.

April 14, 2017-a MZP thuchhuah chuan, doctor dah belh tura sorkar an ngennaah, hun tiam an siam April 14, 2017 thlengin sorkarin a tihhlawhtlin loh avangin vawiin aṭanga tiam chin awm loa total bandh huaihawt an tum thu a puang a ni.

Health department hotute hnen aṭanga thu dawn danin, Champhai District Hospital-ah hian tun dinhmunah doctor 11 an awm mek a, kum 2011 chhiarpuia Champhai district-a mihring awm zat 1,25,370 aṭanga chhûtin doctor pakhatin mi 11,397.3 zel enkawl ang an ni.

Health department hotute chuan, district chhunga mipui awm zat aṭanga chhûta doctor pakhatin mi an enkawl zat chu a dik tak tak thei lo tih an sawi a; Aizawlah phei chuan, district dang zawng zawnga damlote pawhin Aizawl Civil Hospital an pan khawm avangin Aizawl district chhunga chêng zat aṭanga chhût ngawt chu a dik lo thei hle tih an sawi.

Damdawi-ina doctor awm zat
Hospital Doctor District Doctor 1-in
Zat Population A enkawl zat
Aizawl Civil Hospital 88 4,04,054 4,591.50
Lunglei Civil Hospital 26 1,54,094 5,926.70
Champhai Dist.Hospital 11 1,25,370 11,397.30
Siaha Dist. Hospital 9 56,366 6,262.00
Serchhip Dist. Hospital 9 64,875 7,208.33
Kolasib Dist. Hospital 7 83,054 11,864.90
Lawngtlai Dist.Hospital 6 1,17,444 19,674.00
Mamit Dist. Hospital 6 85,757 114,292.00