Vishal zirchianna HM-ah thlen

Home minister R Lalzirliana hoin nimin khan a pisaah Central YMA leh pawl dang ṭhen­khat hruaitute leh sorkar mi pawimawhte an ṭhu khawm a; CYMA-in Vishal Megamart an zir chianna aṭanga an thil hmuhte Home Minister hnenah an thlen.

Home Minister chuan, ram hmasawnna atana rahbi pawimawh tak pakhat chu sumdawnna a ni tih sawiin, "Ram leilung fate'n sum leh páia an intodelh theihna tur tiṭhuanawp thei kawnga hmalakna awm thei lakah erawh kan fimkhur tlân a pawimawh," a ti.

R Lalzirliana chuan, sumdawnna kawngah mipui, thil leitute tana man tlâwm zawk, ram economy ṭhan chhoh zelna atana ṭha si inkaih­hruaina ṭha zawk siam tura ngaihtuahna sên a ṭul thu a sawi bawk.

Meeting-ah hian Aizawl Municipal Cor­poration, Aizawl DC, Taxation department, Commerce & Industries department, Law & Judicial department leh Home department-a hotute an tel a; sumdawng tura Mizorama hnam dang lo lutte hnena Inner Line Permit (ILP) pek dan zir chiang turin Aizawl DC ruat ni se, an ti.