Wineshop-te'n VAT cheng nuai 40 chuang la ba

Mizoram Value Added Tax (MVAT) Act hnuaia Mizoram hmun hrang hranga wineshop/vendor neitute chuan VAT an pe tur a ni a; Taxation department-a Aizawl South Zone, Kolasib Zone leh Serchhip Zone-te chuan Taxation department VAT an pek tur, tuna an la pek loh cheng nuai 40 chuang a la awm.

Taxation department tarlan danin, tun dinhmunah VAT pe tla tawh wineshop 34 hnenah Excise department chuan permit thar a pe chhuak leh tawh a, chung zingah chuan hun rei tak chhung VAT pe lo, tun hnaia VAT pe tla tate an tel nual.

Vanglaini-in RTI Act hmanga Taxation department-a a zawhna SPIO-in a chhan danin, Taxation department-a Aizawl South Zone chhungah April-December 2016 chhungin wineshhop zingah chhiah pe lo an awm nual.

MIFCO-in Rs. 2,42,018 an bá a, ZIDCO-in Rs. 5,61,762 an ba thung. April-December 2016 chhung khan City Wineshop chuan Rs. 19,08,321 leh Aijal Club-in Rs. 48,952 an ba bawk. Aizawl South Zone chhunga zu dawr palite hian tunah hian VAT Rs. 27,60,963 an ba mek a ni.

Kolasib Zone-ah Sapphie, Khuangpuilam wineshop chuan April 1, 2015 aṭanga March 31, 2017 thleng khan VAT Rs. 4,60,000 (approx) an bá a; Mamit Zone-a wineshop pakhat awm chuan tun thlengin registration an la ti lo. Champhai Zone hnuaiah wineshop awm mah se, Ausit Assessment tih zawh hma chu an bat zat hriat theih a ni lo.

Serchhip Zone hnuaiah hian wineshop pasarih awmin, VAT pek loh an nei hlawm. Serchhip Wineshop-in September 2015 leh February 11, 2016 inkarah Rs. 1,75,906 an bá a, hemi chhung vek hian Serchhip Industrial Cooperative Society Ltd.-in Rs. 5,03,882 an bá. Vino Store chuan September 2015 aṭanga February 10, 2016 thlengin Rs. 3,35,146 an bá a, SRV Wineshop-in September 2015 aṭanga February 9, 2016 thlengin Rs. 2,48,511 an bá a ni.

LZ Wineshop-in December 2015 aṭanga February 2, 2016 thleng Rs. 14,298 an bá a, Thenzawl Wineshop-in December 2015 aṭanga February 2, 2016 thleng Rs. 1,57,571 báin, Vantawn Wineshop-in December 2015 aṭanga February 10, 2016 thleng Rs. 1,21,469 an ba bawk. Serchhip Zone hnuaia wineshop pasarih­in VAT an bat zat chu Rs. 15,56,783 a tling.

Lunglei Zone-ah zu dawr pali a awm a, chhiah an bat dan chu hetiang hi a ni. Southern Wine-in April 2015 - March 2016 inkar atan Rs. 23,37,419, Western Wine-in July 2015 - March 2016 inkarah Rs. 7,17,694, Leitlang Wine-in July 2015- March 2016 atan Rs. 6,05,000, Silver Wine Store-in October 2015 - March 2016 atan Rs. 2,63,303 a ni. An vai hian provisional assessed an pe tla vek tawh thung.

Chhiah pek hun (quarterly return period) chhunga pe lo chu MVAT hmangin record awm ang angin chhût (assess) a ni a, warehouse aṭanga March 31, 2017 thlenga zu an lak zawng zawng chu chhût chhuakin, audit assessment an siam a, an chhiah pek leh tur zat chhût leh a ni.

Wineshop zinga VAT pe tla tawh, clearance certificate nei chu dawr 35 a ni a, chungte chu Excise department-in zu zawrh chhunzawm theihna permit a pe leh tawh a; permit chu April 1, 2017 aṭanga March 31, 2018 thleng dam tur a ni.

Excise department chhinchhiah dan chuan, Aizawl district-ah wineshop permit 19, Lunglei district-ah pali, Champhai district, Kolasib district leh Serchhip district-ah pathum ṭheuh leh Mamit district-ah an pe thar leh tawh a ni.

Excise & Narcotics minister R Lalzirliana'n April 15, 2017-a Aizawla press conference a neihah zu dawrte'n VAT an pek chungchang zawhna chhangin, "Wineshop neitute hian VAT an pe vek tur a ni tih kha thutlukna a ni," a ti a; VAT an pek loh chuan wineshop permit thar pek loh tura tih a nih thu leh, chhiah an pek tlak loh chuan zu an lak chhunzawm theih loh thu a sawi.

Zu dawr neitute'n VAT an bat chung­changa zawhna chhangin R Lalzirliana chuan, "VAT bá hi a awm tawh lo turah kan ngai. Inhnialna a awm a, wineshop neitute hi chhiah pe nawnah an inngai a, chumi chung­chang chu tihchian a nih hma hun chhungin VAT an pe lo a ni," a ti.

Zu dawr neitute'n chhiah an pe nawn lo tih sorkarin a tihchian hnuah dawr neitute chu VAT pe tura tih an nih thu sawiin, Excise Minister chuan, "VAT hi an pek vek loh chuan wineshop permit thar pek loh tur tiin sorkarin a ti a, an pek vek loh chuan zu an la chhunzawm thei lo," a ti.