Aizawl FC vs Mohun Bagan thlirlâwk

Nimin khan Home minister R Lalzirliana hoin a pisaah April 22, Inrinnia Rajiv Gandhi Stadium-ah Aizawl FC leh Mohun Bagan AC ten I-League an khelh tur an thlirlâwk a; Mizoram sorkar, Mizoram Football Association leh Aizawl FC aiawhte telin, venhimna leh lirthei kal dan tur leh dahna chung­changte an sawiho.

Meeting-ah hian, inkhel enna ticket hralh zawh tawh a nih avangin, ticket lei hman lo, en duh site tan RG Stadium hungna pawna din theihna ticket Rs. 30 man a siam a nih thu an tarlang.

Meeting chuan, lirthei hunna chu Aizawl By-Pass Road leh 3rd MAP khelmualahte siam a ni dawn a, mipuite chu rua­hmannate ngai pawimawh turin an ngen a ni.

Traffic lama ruahmanna siam dan
1. College Veng kawng pengṭhuam leh 3rd MAP gate inkar kawngpui sirah lirthei dah/park phal a ni lo.
2. Mualpui Zero Point leh ITI-Mualpui kawng inkar kawngpuiah lirthei reng reng chhun dar 12 leh tlai dar 6 inkarah dah phal a ni lo. Zero Point aṭangin chho zawngin chhun dar 12 leh tlai dar 2:30 inkarah tlan phal a ni lo.
3. Zero Point leh RG Stadium/R Dengṭhuama Indoor Stadium inkarah chhun dar 12 leh tlai dar 6 inkarah lirthei dah phal a ni lo.
4. Mualpui Zero Point aṭanga Republic Veng via Salem Veng chu one way tur a ni a, chhun dar 12 leh tlai dar 2 inkarah chho zawngin lirthei tlan phal a ni lo a, tlai dar 3-6 inkarah chhuk zawnga tlan phal a ni lo.
5. Aizawl By-Pass Road-ah chhun dar 12 aṭangin tlai dar 6 inkarah motor lian tlân tlang phal a ni lo.
6. RG Stadium chu engtik lai pawhin lirthei te chi tan Falkland Veng leh Melthum aṭangin pan theih a ni.
7. R Dengṭhuama Indoor Stadium leh a chhehvelah lirthei park a remchan dawn loh avangin 3rd. MAP ground leh Aizawl By-Pass Road kawng sir kopang lamah chauh lirthei dah tur a ni a, mi dang lirthei dah tawh dah thuah phal a ni lo.
8. Venghnuai Field leh Damveng inkar kawngah chhun dar 12 leh tlai dar 2:30 inkarah chhuk zawng chauha tlan phal a ni a, tlai dar 3:30 leh dar 6 inkarah chho zawng chauha tlan phal a ni.