Aizawlah ruihhlo dona ní hman a ni ; Ruihhlo vbc. 239.08 chuang hû hâl a ni

Nimin June 26 kha International Day Against Drugs Abuse and Illicit Trafficking a ni a, Pathianni a nih avangin June 25, Inrinni khan hmun ṭhenkhatah hman a ni. Khawvel pum huap ruihhlo dona ní pual hian Mizoramah ruihhlo chi hrang hrang cheng vaibelchhe 239.08 chuang (tluklehdingâwn hnih chuang) hû hâl a ni.

International Day Against Drugs Abuse and Illicit Trafficking pual hian hriat theih chinah Aizawl leh Champhaiah ruihhlo chi hrang hrang tualchhunga hralhna anga

Rs 2,39,08,76,697 (cheng nuai 23,908.76) hù hâl ral a ni a; chu'ngte chu June 23, 2022-a Excise & Narcotics department-in an hâl Rs 2,64,34,652 hù, police man June 24-a Aizawla hâl Rs 2,34,02,17,045 hù leh Champhaia hâl Rs 2,39,10,000 hù a ni.

International Day Against Drugs Abuse and Illicit Trafficking pual hian Foundation for Drug Free Mizoram chuan Inrinni zing khan Vanapa Hall leh Millennium Centre inkarah ruihhlo dona kawngzawh an buatsaih a, MJA president C Lalrambuatsaiha'n a vailiam.

Ruihhlo dona kawngzawh ṭanna inkhawm, Vanapa Hall kawta buatsaihah MJA President chuan, hmelma ngáwichawi ruihhlo leh zuin Mizoram a rún mek tih sawiin, "Kan ṭhalai tam tak a hneh tawh a, chhungkaw tam tak a luhchilh a, a tibuai mek. A la luhchilh lohte pawh a hnaih hle reng a ni," a ti a, FDFM-in ruihhlo dona kawngzawh an buatsaih chuan awmzia a neih ngei a beisei thu a sawi.

C Lalrambuatsaiha chuan, Mizoram chu ram hmasawn leh ropui ni tur chuan ṭhalaite'n hna an thawh a ngai tih sawiin, "Hna thawk hlei thei loa min siamtu ruihhlo hi nasa taka kan do a ngai. Ruihhlo hian min rún a, nasa taka kan do loh chuan nakin lawkah ṭhalai hman tlak loh kan nei ṭeuh dawn a, chhungkuain, khawtlangin, ramin nasa takin a tuar dawn. Nasa lehzuala ṭan kan lâk a ngai a, ruihhlo do tura ke kan pên chhuah a pawimawh," a ti.

FDFM hian sikul leh sunday school eng emaw zatah ruihhlo ṭhat lohzia zirtirna an kalpui tawh a, naupang 7,000 chuang an zirtir tawh a ni. Kawngzawhah hian mi ṭhahnem tak an tel a, ruihhlo ṭhat lohzia tarlanna thuziak an keng a ni.

Samaritan Society of Mizoram (SSM) leh Drug Addiction and AIDS Resistance Society pawhin Inrinni khan Chanmari YMA Hall-ah International Day Against Drugs Abuse and Illicit Trafficking an hmang. SSM project manager Lalhruaizela Hmar chuan, tun hnaia Mizorama ruihhlo hâl ral chu tam tham hle mah se, hâl ral tâk lêt eng emaw zata tam kha man loh a awm a rinawm thu a sawi. SSM project director John Thansanga'n thu a sawi bawk.

Drug Addiction and AIDS Resistance Society hi ruihhlo ti ṭhinte'n damna kawng an zawh theihna tura anmahni an intihchakna turin kum 2008-ah din a ni a, member 150 vel an awm mek a ni.