Leiminin mi pali a hnâwl

June 25, 2022, Inrinni zing dar 7:30 vel khan Seling-Champhai kawng, Seling aṭanga Champhai lam km. chanve velah kawng chhaka leiminin private car leh Saitual taxi pakhat ve ve a hnâwl a, motor-ah hian mi pali chuang mahse thi an awm lo.

Lirthei pahnih hi Saitual aṭanga Aizawl pana tlân an ni a, chirhdiaka an tàn laiin kawng chhak aṭanga leiminin a hnâwl a ni. Thil thleng hmutu pakhat chu Seling lamah tlân lêtin, thil awm dan mipui a hriattir a, mipuiin vanduaina thlenna hmun hi pan khawmin, leimin avanga kawnga táng mekte nen chhan chhuah hna an thawk a ni.

Thu dawn danin, private car-ah mi pahnih, mipa leh hmeichhia an chuang a, leiminin kawng thlang meter 100 vela thui a hnâwl a; Saitual DAO pisa-a thawk Lincy Lalrindiki, Bawngkawn, Aizawl chu a lu leh taksaah a hliam nat deuh avangin Aizawl panpui nghal a ni.

Taxi-ah hian Lalrinsanga (34) s/o Rokima (L), Saitual Venglai leh Lalrinmawii d/o Nghaki, Saitual PWD Vengte an chuang a, kawng thlanga thingkungin a lo dan avangin a tawlh thui lo. A chhunga chuangte na lutuk loin an hliam a, Thingsulthliah damdawi-inah lak an ni.