CYMA-in Silchar-ah tui litre 15,000 a thawn

Silchar leh a chhehvela tuilian rapthlak tuartute ṭanpui nan Central YMA chuan nimin khan tui thianghlim litre 15,000 Silchar-ah a thawn a, nimin chhun khan CYMA president R Lalngheta'n a vailiam.

Central YMA general secretary Prof. Lalnun­tluanga hnen aṭanga thu dawn danin, Silchar-a tui thianghlim thawn tur zinga a tam zawk, ûm 14,196 chu YMA branch leh mi hrang hrang thawh khawm a ni a, a vaiin litre 15,000 vel a ni.

Silchar ṭanpuina tur hian Aizawla YMA branch 31 chuan tui báwm 696 an thawh khawm a, CYMA, pawl dang leh mimalin báwm 317 an thawh a, YMA branch pathumin tui leina tur pawisa Rs 20,000 an thawh khawm bawk a; a vaiin báwm 1,183 a ni.

Tui thianghlim hi lirthei pakua hmangin phurh thlak a ni a, lirtheite chu Aizawla YMA branch pasarihin an thawh. Tui hi CYMA hruaitute leh lirthei enkawltu mi 24-te'n Silchar an panpui a ni.

CYMA chuan Silchar-a tui thianghlim thawn tur hian Inrinni zan khan an rél chawp a, hma la zui nghalin, tui thianghlim thawh thei YMA branch, pawl leh mimalte a ngen a, thawh theihte'n an thawh nghal a ni. CYMA chuan, tui thianghlim an ken thlakte chu Cachar DC hnenah hlan tum a ni a, Assam sorkar pawhin mumal taka lo dawnsawn a tum niin an tarlang.

Tui thawn thlâknaa lirthei kalte senso leh a ṭula hman atan minister of state Robert Romawia Royte-in Rs 50,000 a thawh tih an tarlang bawk.