CM-in sikul sak thar a hawng

Chief minister Zoram­thanga chuan June 25, Inrinni khan Ṭhuampuiah Aizawl North High School in thar a hawng a, Ṭhuampui YMA Hall-ah an zirlai HSLC 2022-a pass-te chawimawina hun a hmanpui nghal. Chief Minister chuan, chhungkua leh khawtlanga buaina leh harsatna thlentu langsar tak chu zu leh ruihhlo a nih thu a sawi.

CM Zoramthanga chuan, sorkarin zirna ngai pawimawhin tihchangtlun zel a tum tih a sawi a; zirnaa theihtawp an chhuah laiin, an nun hloh loa inthunun tlat turin ṭhalaite a chah.

Tunlaiah chhungkua leh khawtlanga hlim lohna, buaina leh harsatna thlentu langsar tak chu zu leh ruihhlo a nih thu sawiin Chief Minister chuan, "Ṭhalaite ruihhlo lakah in fihlim tlat a ṭul. Heng thilte hi siamtuin kan nih tura a duan ang ni pha loa min dahtu a ni," a ti.

Khualzahawm School Education minister Lal­chhandama Ralte pawhin thu sawiin, "Ram hma­sawnna atan zirna hi lung­thu pawimawh tak a nih avangin zirnaah sorkarin theih­tawpin hma a la zel dawn. Zirna péng hrang hranga hmasawnna bakah, hnam ziaráng hriat chianna leh mahni nihnaa nghet tlata kan awm a pawimawh," a ti a; Ṭhuampui khawtlangin zirna an ngaih pawimawh avanga an hmalakna chu fakawm a tih thu a sawi.

Aizawl North H/S in hi March 24, 2021-ah sak ṭan a ni a, November 1, 2021-ah an luah ṭan. In sakna atan Ṭhuampui Local Council, pawl hrang hrang leh khawtlang mipuiah vehbúr khawn a ni a, Rs 11,23,353 an séng tawh a ni.