Sorkar hnathawkte'n Badge dum an bel dawn

Sorkar hnathawk páwl hrang hrang intèl khawmna, Federation of Mizoram Government Employees & Workers (FMGEW) chuan dear­ness allowance 34% pe tura Mizoram sorkar kar nan vawiin aṭang hian badge dum an bel dawn.

Thu dawn danin, June 13, 2022-a FMGEW Council Meeting-in a rêl angin DA pung sorkarin a pek ṭhin chungchangah June 21, 2022-a FMGEW Executive Committee ṭhukhawm chuan June 27 aṭanga July 1, 2022 thleng, tun kar chhung zawng an hnathawhna hmunah badge dum bel an rêl a ni.

FMGEW thuchhuak chuan, thil man to zel phuhrûkna atana sorkar hnathawkte DA pung ṭhin chu tunah hian sorkar laipui hnuaia thawkte chuan 34% an la tawh a, Mizoram sorkar hna­thawk­te chuan 28% an la mek thung tih tarlangin, "Central anga kan lak ve nan sorkarah vawi eng emaw zat kan dilna chuan awmzia a neih loh avangin sorkar kar nan June 27 aṭanga July 1, 2022 thleng badge dum bel ni se tia rêl a ni," a ti. 

Bagde dum belhin awmzia a neih loh chuan hmalak chhunzawm zel dan tur chu rêl ṭhat leh atan an dah a; badge bel tur chu mahni pawl ṭheuh inngaihtuah turin an pawla tel sorkar hnathawk pawl hrang hrangte an chah a ni.

FMGEW thuchhuak chuan, sorkar hnathawkte kum tin thi leh pension vangin mi 2,000 chuang an chhuak zel tih sawiin, "Chung mite aia thawk tur hna thar lak kum 10 chhung a awm fumfê si loh avangin hnathawktute leh hnathawhin nasa takin a tuar zel a. Hetiang zela kan kal chuan sorkar leh a hnathawhin a tuarin, hmasawnna hna thawktute indaih lohna nasa zelin hna thawh chak loh phah theih a ni," a ti.

FMGEW hian kum 2021 General Conference-a an rêl tawh angin, Mizoram sorkar hnathawk pension hun hman mek, kum 60 chu kum 62-ah tisang turin sorkar an ngen bawk a ni.