KHAWTHLIR

Thisen pe
June 25, Inrinni khan ṬKP, Luangmual Bial chuan Civil Hospital, Aizawl tan thisen unit 71 an pe a, petute mipa 60 leh hmeichhia 11 an ni. KṬP, Venghlui Branch pawhin Venghlui Bial KṬP golden jubilee pualin Civil Hospital blood bank-ah thisen unit 36 an pe a, petute mipa 25 leh hmeichhia 11 an ni. HBK MMA Gym pawhin Synod Hospital Blood Bank-ah unit kua an pe bawk.

Kawng thar hawng
Aizawl South-II bialtu MLA Lalchhuanthanga chuan June 25, Inrinni khan a bial chhung, Mualpuia veng chhung inkalpawhna kawng siam thar a hawng. Mualpui huam chhunga Aizawl By-Pass Road aṭanga Society Road inkar kawng, cement concrete hmanga siamna atan hian MLA fund hman a ni.

Pass-te lawmpui
Khatla East khawtlang chuan June 25, Zirtawpni zan khan kum 2021-2022 chhunga an veng mi HSLC leh HSSLC pass tharte lawmpuina hun an hmang a, bialtu MLA VL Zaithanzama leh bialtu councillor Ramthanzauvi ten an hmanpui. MLA leh Councillor hian Khatla East Welfare hruaitute hnenah a ṭula hman turin lawmpuina pawisa an hlan a ni.

Lunglei MJA-in Thing an phun
MJA, Lunglei district chuan June 25, Inrinni khan kum hmasa lama thing an phun tawhte bul vel an sâm fai a, thing eng emaw zat an phun belh bawk a, minister C Lalrinsanga'n a hmanpui.Lunglei MJA hian Green Mizoram Day pualin kum ruk kal ta aṭang khan Pukpui khaw dái leh Kawmzawla Observation Home bulah thing ṭiak eng emaw zat an phun tawh a, ṭhenkhat chu lian tak tak a nih tawh laiin, kângmei leh leivûng paih vanga thi a awm nual bawk.

Police-in man
Khawzawl police-te chuan tun hnai khan Hmingthanmawia (51) s/o Thanzaua, Khawzawl Zaingen Veng hnen aṭangin beer bûr 258 (dagon 182 leh maximus 76) an man a, MLP Act section 6(1)/7(3) hnuaiah thubuai an ziak lut. June 24 zan khan Champhai police, Khankawn checkgate duty-te pawhin Niangsanluni (44) w/o Rothlengliana, Khawmawi, Myanmar hnen aṭangin heroin gram 26 an man bawk.