ASF kaihhnawihah vawk 11,418 thi tawh

Kumin chhungin Mizorama khua/veng 90-ah nimin thleng khan vawk pùl hri, African Swine Fever (ASF) a léng tih finfiah a ni tawh a, chu'ngah chuan vawk 6,286 thi tawhin, hmun hrang hrangah vawk 5,132 suat a ni tawh a, a vaiin vawk 11,418 a ni.

Kum 2022 chhung bikah June 26, nimin thleng khan district 11 zinga pakua - Aizawl, Lunglei, Champhai, Kolasib, Serchhip, Mamit, Saitual, Khawzawl leh Hnahthial district-a khua/veng 90-ah ASF a léng tih finfiah a ni tawh a, vawk 5,132 suat tawh a ni.

Aizawl, Lunglei, Champhai, Kolasib, Serchhip, Lawngtlai, Mamit, Saitual leh Khawzawl district-ahte vawk hri lênna nia rinhlelh, infected area-a la puan loh khua/veng 55 awmin, chu'ngah chuan vawk 822 a thi tawh a, vawk 190 suat a ni tawh bawk.

District pakuaa ASF lênna khua/veng 90 zinga 27 chu Champhai district-a mi an ni a; Champhai district-ah hian ASF vangin kuminah vawk 2,831 thi tawhin, kumina ASF vanga Mizoram puma vawk thi 6,286 aṭangin 45.03% a ni. Vawk suat tawh zawng zawng 5,132 aṭangin Champhai district-a vawk suat zat 3,389 chu 66.03% a tling.

Aizawl district-ah nimin thleng khan ASF lênna khua/veng 24-ah vawk 1,857 a thi tawh a, vawk 517 suat a ni tawh. Aizawl district-a ASF infected area 24 zinga 15 chu Aizawl khawpui chhunga veng hrang hrang a ni.

Champhai district-a Farkawn khuaah ASF vanga vawk thi leh suat a tam ber a, vawk 818 thi tawhin AH&Vety department hriatpuinain vawk 1,708 suat a ni tawh. Kolasib leh Saitual district-ah ASF lênna khua/veng paruk ve ve awmin, vawk suat an la awm lo.

ASF lênna hmuna vawk suat 5,132 leh ASF rinhlehna hmuna vawk suat 190 chu a vaiin 5,322 a ni a, hri lenna hmun leh rinhlelhna hmuna vawk thi zawng zawng chu 7,108 a ni.