Additional DC-in leivûng paih dan a enfiah

Siaha district-a National Highway-54 kawngpui zauhnaa Package-8, Zero leh Tipa inkar kawng laih mek chu June 25, Inrinni khan Siaha additional DC Donny Lalruatsanga'n tlawhin, leivung paih dan a enfiah. Kawng laihin thing phun a tihchhiatte a theih ang anga phun belh turin company hotute hriattir an nih tawh thu a sawi.

Donny Lalruatsanga hian kawng laitu company hotute leh NH-54 Package-8 huam chhung khaw hrang hranga khawtlang hruaitute a kâwm a; kawng laih mekin Mizoram hmun hrang hrangah lui tui a tihbawlhhlawh nasat avangin NH-54 (Zero-Tipa) kawng laihna leivûng paih dan enfiah a nih thu sawiin, "Leivûng hi duh duhna hmuna paih ngawt a thiang lo a, a paihna tur hmun enfel hmasak a, lui leh ramngaw tichhe lo thei ang bera hmun thlan bikah chauh paih tur a ni," a ti.

Lei laih leh leivûng paih chungchangah company hotute sawipui an nih tawh thu tarlangin Addl DC chuan, "Meeting-a rèl a nih angin company lamin leivûng paih chungchangah thurèl an zawm leh zawm loh chu District Administration aṭangin enfiah ṭhin tur a ni a, kawng laihin thing phun a tihchhiatte pawh enho a ni," a ti a; company hotute chu a theih ang anga kawngpui sira thing phun belh (afforestation) chungchangah hma la tura hriattir an nih thu a sawi.

Donny Lalruatsanga chuan, kawng zauh hna chu khaw chhunga thawh ṭan tawh tur a nih avangin ram a nghawng neitu, zangnadawmna dawng/la tawhte chu insawn chhuah a hun tawh thu hriattir hmasa tura kal an ni thu leh hriattirna tihchhuah thuai a nih tur thu a sawi bawk a; mipui hriattirna chungchangah khawtlang hruaitute chu thawhpuiah a sawm a ni.

Siaha Addl DC hi sub-deputy commissioner Collin Hlychho, NHIDCL consultant AK Agarwal, NH-54 Package-8 (Amobyu V - Tipa) service provider/contractor Bharatiya Infra Projects Ltd. project manager S Majumder leh Package 8-a Amobyu V, Amobyu CH, Amobyu B leh Theiva khuaa khawtlang hruaitute'n an ṭawiawm a ni.