BJP-in Emergency Black Day an hmang

BJP, Mizoram Pradesh chuan June 25, Inrinni khan an pisaah Emergency Black Day vawi 47-na an hmang.

BJP tarlan danin, prime minister Indira Gandhi, Raebareli biala Congress ticket-a MP atana thlan tlin chu sum leh pái leh sorkar official-te hmanga campaign-ah puhin Raj Narain-a'n Allahabad High Court-ah a khing a, High Court hian thiam loh chantirin, MP a nihna a hlih bakah kum ruk chhung MP candidate ni thei lo turin a hrem a ni. Indira Gandhi chuan Allahabad HC thutlukna chu Supreme Court-ah a khing a, Supreme Court chuan HC thutlukna a nemnghet (uplift) a ni.

Chumi hnuah Indira Gandhi chuan Indian Constitution Article 352 leh 359 hmangin June 25, 1975 zanlaiah emergency a puang a, emergency puan ni chu BJP chuan Emergency Black Day tia vuahin an hmang ṭhin. Maintenance of Internal Security Act hman a ni a, chumi hmang chuan Mizoramah pawh Brig. T Sailo leh journalist 10 chuang jail-ah tàntir an nih thu an tarlang.

Inrinnia Emergency Black Day vawi 47-na hmanna inkhawm hi Dr RL Hruaia, National Council member-in a kaihruai a, Mizoram BJP secretary P Sanghmingthanga'n Emergency Black Day chungchang a sawifiah a, vice president JB Rualchhinga'n thu a sawi a ni.