Aizawl Dist Monitoring Committee-in NH kawngpui laihte enfiah an tum

Aizawl District Monitoring Committee chuan June 25, Inrinni khan an chairman Dr Lalhriatzuali Ralte, bawrhsap hoin luipui leh luikawra kawng laihna leivûng paih dan mumal loin chhiatna a thlen chungchang an sawiho. A hmasa atan NHIDCL-in kawngpui an laih mek - NH-54 Aizawl-Tuipang kawng leh NH-06 Seling-Zokhawthar kawng enfiah an rél.

Ṭhutkhawma tarlan danin, National Highways and Infrastructure Development Corpora­tion-in Mizoram hmun hrang hranga kawngpui zauh hna an thawh mekah, NH-54 Aizawl-Tuipang inkara Aizawl district bikah forest clearance an nei tawh a, hna an thawk mek. NH-06 Seling-Zokhawthar kawngah erawh chuan forest clearance an dil mek thung.

Seling-Zokhawthar kawngah forest clearance neih hma pawhin NHIDCL chuan kawng siam hna nasa takin an thawk lâwk tawh a; leivung paih dan mumal loh vanga a chhehvela nasa taka thil a tihchhiatte chu a rang lama enfiah an tum a ni.

June 2, 2022 khan Aizawl DFO Laltlanhlua Zathang, Aizawl District Monitoring Committee secretary ni bawk chuan NHIDCL hnenah hian forest clearance nei loa an hnathawh chu chawlhsan turin thu a pe tawh bawk.