Covid-19 vei hmuh chhuah a pung

June 24, Zirtawpni leh June 25, Inrinni khan Mizoramah Covid-19 vei hmuh chhuah a pung a, Inrinni kha kumin May 13 hnua hmuh chhuah tam ber ní leh May 15 hnua positivity rate a sàn ber ní a ni. Inrinni leh nimin khan hripui vei dam tawh mi 35 chhuahtir an ni a, mitthi an awm lo.

Covid-19 positive June 24-a hmuh chhuah mi 35-te chu mipa 15 leh hmeichhia 20 an ni a; ZMC RT-PCR laboratory-a hmuh mi pahnih, TrueNAT hmanga hmuh pakhat leh RAT hmanga hmuh 32 niin, positivity rate 18.82% a ni. Hmuh chhuah mi 35 zinga 23 chu Police Training School, Thenzawla mite an ni.

Inrinnia hripui vei hmuh tharte chu RAT hmanga hmuh chhuah vek niin, positivity rate 23.61% a ni a, kumin May 15 hnua positivity rate a san ber ṭum a ni. Mi 55-te chu mipa 25 leh hmeichhia 30 an ni a, an zinga 12 chu Durtlang mi an ni. Endikna dang hmangin swab sample endik a ni lo.

Nimin khan Covid-19 vei dam tawh mi 11 chhuahtir an ni a, Inrinni khan mi 24 chhuahtir an ni bawk.

IDSP record angin, Mizoramah Covid-19 vei 2,28,895 hmuh chhuah a ni tawh a, mipa 1,06,562 leh hmeichhia 1,22,333 an ni a, mipa aiin hmeichhia 15,771-in an tam zawk. Nimin tlai dar 5 thleng khan mi 2,28,031 (99.62%) chhuahtir an ni tawh a, mi 702 (0.31%) thi tawhin, enkawl mek mi 162 (0.07%) an awm.

Nimin tlai dinhmun angin, Mizorama district 11 zingah Covid-19 positive awm tawh rih lohna district pathum - Siaha, Champhai leh Lawngtlai district-te a awm a; positive active case tamna ber Aizawl district-ah mi 77 an awm mek a, Serchhip district-ah mi 29, Kolasib district-ah mi 19 leh Lunglei district-ah mi 16 an awm mek bawk.