GST-ah ILP kan telh ngei dawn - Taxation Minister

Taxation minister Lalsawta chuan, July 1, 2017 aṭanga India ram puma Goods and Service Tax (GST) hman ṭan turah, Mizoram bikah chuan GST-ah Inner Line Permit (ILP) chungchang telh ngei a nih dawn thu a sawi.

Nimina Mizoram Merchant Association (MIMA)-in Synod Conference Centre-a General Assembly an neih a hmanpuinaah thu sawiin Taxation Minister chuan, GST chu kumin July 1-ah hman ṭan tur a nih thu a sawi a, "GST hi Central-in state tinte May thla chhunga dana siam vek turin a ti a. Mizoramah chuan ILP zeh tel kan duh a, kan ti tel ngei ang," a ti.

Lalsawta chuan, GST hmanga chhiah lak turah bungrua (goods) ringawt ni loin, service a tel tawh dawn thu sawiin, "Service aṭangin chhiah lak a ni dawn," a ti a; GST chu thawh chhuah leh thawn chhuah nei lo state-te'n an hlâwkpui deuh tura ngaih a nih avangin Mizoram pawhin a hlâwkpui tura an ngaih thu a sawi.

Taxation Minister chuan, Mizoram chhunga tribal ni lote sumdawn phal loh (trading by non-tribal) tih chu kum 1977-ah Mizoramah hman ṭan a ni a, kum 1987-ah a tawp tih sawiin, "Trading by non-tribal hi awmze nei takin kan ti hlei thei lo. District Council-ah chuan an la ti," tiin District Council pawna cheng Mizo dangte erawh an chêp thu a sawi.

Mizote chu sumdawn thiam tak India ramah kan awm avangin India ram dan hman ve a ngaih thu sawiin Lalsawta chuan, "Sumdawn hi kan thiam ve a ngai tihna a ni... Sumdawnnaah vên kan ngai tih kan hria a. Mahse, venna ringawt ai chuan keimahni lamah kan ṭan ve a ngai; vên miah loha chîm pil loh tam tak an awm," a ti a; Mizoram chu hmarchhak state zinga sumdawnnaa chhan tlâk la awm chhun a nih thu a sawi.

Minister Lalsawta chuan, sawhthing chíngtute an zahawm a tih thu leh an thawhrim thu a sawi rualin, sawhthing chu mi zawng zawng duh a ni lo niin a sawi a, "Sawhthing hi kan ram thlalera siam theitu a ni. Sumdawnnaah chuan duhtu bik riau awm chi hi a fuh vak lo," a ti.

MIMA hian resolution an pass a; Aizawla Vishal Megamart din dan chhui chiang turin sorkar an phût a, May 31, 2017 thleng sorkar ngaihchân a, chumi chunga hmalakna a awm loh chuan April-June, 2017 thla chhung chhiah pek loh an tum thu leh, dawr khàr thlenga hmalak an tum thu an tarlang.

GST-ah ILP zeh tel an duh thu te, Taxation department-in hnam dang mi 311 hnena MVAT registration a pek leh AMC-in hnam dang mi 138 hnena shop licence a pekah thil dik lo a awm chuan tihtawp vek an duh thute an tarlang a; sumdawngte'n to uchuak taka thil an zuar a nih chuan, mipuitein tláwm zawka an lei theih nan a tláwm thei ang bera hralh turin an inchah bawk.